Rama uron kryeministren e Italisë, Giorgia Meloni

Shqiperi

Gazeta Express

22/10/2022 11:36

Giorgia Meloni është betuar si Kryeministrja e re e Italisë ditën e sotme. Urimin e parë nga qeveria shqiptare ajo e mori nga Kryeministri Edi Rama.

Në një postim në Twitter Rama ka uruar Melonin për postin e ri.

“Urime gruas së parë të thirrur nga populli për të udhëhequr Italinë, një vend të cilit Shqipëria i detyrohet shumë dhe me të cilin na lidh një miqësi e lashtë dhe vëllazërore, e cila ka frymëzuar gjithmonë marrëdhëniet mes qeverive tona. Suksese Giorgia Meloni”, shkruan Rama.

Sa i përket kabinetit qeveritar italian, Antonio Tajani do të drejtojë Ministrinë e Jashtme. Ish-kryetari i Parlamentit Europian, pjesë e Forza Italias, konsiderohet si një prej mbështetësve më të fortë të procesit të anëtarësimit të Shqipërisë dhe Ballkanit Perëndimor në Bashkimin Europian.

Ai dhe Mateo Salvini do të mbajnë edhe postet e zv/Kryeministrit. Kreu i Lega Nord do të mbajë edhe portofolin e Ministrit të Infrastrukturës, duke shuar përfundimisht shpresat e rikthimit të tij si ministër i Brendshëm. /Gazeta Express