Një vit, dy ministra: Shëndetësia në kolaps

Lajme

Gazeta Express

04/01/2023 6:52

Sektorin që ish-ministri i Shëndetësisë, Rifat Latifi pati premtuar se do ta vendosin në binarë, e la jashtë tyre. Në qendër të vëmendjes as gjatë këtij viti nuk ishin pacientët e as punëtorët shëndetësorë.  Qindra mjekë e infermierë lëshuan vendin për një jetë më mirë, derisa numër i madh i pacientëve, si çdo herë, u desh që të trokasin në dyert e spitaleve private, për shkak të mungesës së shërbimeve në ato publike.

Për një vit, dy ministra, shumë premtime, e pak punë.

Filloi me Rifat Latifin në krye të Ministrisë së Shëndetësisë, e mbaroi me Arben Vitinë.

Viti 2022 e gjeti sektorin e shëndetësisë në gjendje të brishtë.

E në këtë gjendje, edhe u la për vitin e ardhshëm, pa Sistem Informativ Shëndetësor, pa Sigurime Shëndetësore, pa shumë barna e materiale esenciale, pa shumë shërbime, pa shumë aparatura, por me lista të gjata të pritjes.

Qindra punëtorë shëndetësorë edhe këtë vit lëshuan Kosovën, për një jetë më të mirë jashtë vendit.

Ndërsa, u alarmua se shumë reparte në institucionet publike shëndetësore janë në prag të mbylljes për shkak të mungesës së stafit.

Në mungesë të punëtorëve shëndetësorë kanë ofruar shërbime edhe Qendrat e Mjekësisë Familjare, e spitalet rajonale.

Derisa, për mungesën e stafit, alarmuan edhe nga Oda e Mjekëve të Kosovës, nga e cila thanë se numër i madh i mjekëve po lëshojnë vendin, për shkak të kushteve jo të mira të punës e pagave të ulëta.

Nga Sindikata e punëtorëve të QKUK-së kanë thënë se vetëm gjatë këtij viti 500 infermierë janë larguar nga Kosova derisa kanë paralajmëruar se 1 mijë 500 të tjerë pritet ta lëshojnë vendin gjatë vitit të ardhshëm.

Përkundër nevojave të të gjitha institucioneve shëndetësore për staf, nga Ministria e Shëndetësisë kanë deklaruar se Qeveria e Kosovës ka buxhetuar 300 pozita të reja për profesionistë shëndetësorë në Kujdesin Parësor Shëndetësorë.

“Qeveria e Republikës së Kosovës ka buxhetuar 300 pozita të reja për profesionistë shëndetësorë në Kujdesin Parësor Shëndetësore dhe 100 pozita të reja për profesionistet shëndetësorë në kujdesin dytësor dhe tretësor, ku punësimi i tyre do të bëhet në përputhje me ligjet respektive në fuqi përmes konkurseve të institucioneve”, Ministria e Shëndetësisë.

Ndërsa, problem gjatë këtij viti ishte edhe sigurimi i barnave dhe materialeve shpenzuese.

Nga xhepi i tyre pacientët u desh që të sigurojnë vet medikamentet të cilat nuk u gjendën as në QKUK, as në spitale e as në Qendra të Mjekësisë Familjare.

E barrën e pacientëve e rëndoi edhe mungesa e shumë shërbimeve shëndetësore, si rrjedhojë, qytetarët u detyruan që të kërkojnë trajtim jashtë vendit.

Por që për shkak të kushteve jo të mira ekonomike, shumë prej tyre morën trajtimin me vonesë, për shkak se mbetën në listat e gjata të pritjeve në Fondin e Sigurimeve Shëndetësore.

Pjesë e këtyre listave ishin edhe dhjetëra pacientë që prisnin që nga viti 2020 për t’iu lëshuar një pjesë e fondeve për trajtim në institucionet private brenda dhe jashtë vendit.

Ndërsa, për shkak dyshimeve për keqpërdorime, Fatmir Plakiqi u shkarkua nga posti i drejtorit të Fondit për Sigurime Shëndetësore, shkruan Kanal 10.

Për problemet që përcollën shëndetësinë gjatë këtij viti disa herë u diskutua edhe në Komisionin Parlamentar për Shëndetësi, ku edhe nuk munguan përplasjet mes pushtetit e opozitës.

Nga opozita kritikuan ekzekutivin derisa thanë se e ka lënë anash këtë sektor.

Përkundër premtimeve të vazhdueshme, sektori i shëndetësisë me një buxhet prej rreth 200 milionë eurove, edhe gjatë vitit 2022 u la jashtë “binarëve.