Thaçi: Kosovës iu hoq reja e zezë e trafikut të organeve, pres të shfajësohem nga çdo akuzë tjetër

Lajme

Gazeta Express

04/04/2023 13:23

Ish-presidenti i Kosovës, Hashim Thaçi ka folur sot para trupit gjykues të Gjykatës Speciale në Hagë. Thaçi ka thënë se i vjen keq për të gjitha viktimat e luftës pavarësisht përkatësisë etnike, fetare apo politike.

Thaçi në fjalën e tij ka thënë se viktimat s’mund të marrin drejtësi kur ndiqen të pafajshmit dhe padrejtësia s’mund të rregullohet duke bërë një padrejtësi tjetër.

Ish-presidenti i Kosovës ka thënë se është i pafajshëm për të gjitha akuzat që i bëhen nga Prokuroria Speciale  Hagës.

“Faleminderit shumë për mundësinë që t’iu drejtohem. Sot po nisim një rrugëtim së bashkë, rrugëtim drejt së vërtetës dhe drejtësisë. Këto janë parime të çmuara për mua, janë gurthemeli i demokracive dhe paqes. Më lejoni të shfrytëzoj këtë moment që ndjej keqardhje dhe dhimbje për të gjitha viktimat e kësaj luftë të tmerrshme pavarësisht përkatësisë etnike fetare apo politike. Viktimat nuk marrin drejtësi kur të pafajshmit ndiqen. Padrejtësia nuk ndreqet nga një padrejtësi tjetër. Unë jam i pafajshëm për të gjitha këto akuza”, ka thënë Thaçi.

Ai ka thënë se është i gatshëm të përballet me sfidën që ka përpara. Thaçi ka treguar se ishte kthyer nga Zvicra për të ndihmuar lirinë e Kosovës.

“Unë jam gati të përballem me këtë sfidë të re dhe të kem sukses për familjen time, popullin tim dhe vendin tim. Rruga jonë drejt lirisë ishte e gjatë dhe e vështirë. Isha student në Zvicër kur u masakra familja Jashari më 1998. Si shumë shqiptarë u ktheva për ta ndihmuar vendin tim. Kushdo që do të ishte në vendin tonë, do ta kishte bërë të njëjtën gjë. UCK përbëhej nga njerëz të thjeshtë që përpiqeshin të mbronin shtëpitë dhe familjet e tyre. Ata luftuan dhe vdiqën si heronj. Ky ishte çmimi i lirisë.Mijëra familje humbën më të dashurit e tyre në qindra masakra të kryera nga forcat serbe”, ka shtuar tutje.

Thaçi ka thënë se kundërshtarët e Kosovës dhe të UÇK-së kishin qenë ushtria, policia dhe paramilitarët serbë të cilët kishin marrë përvojë të madhe në fushatat e tyre të vrasjeve në Bosnje.

“Kundërshtarët tonë ishin ushtria policia dhe paralimitarët serbë të kalitur në fushatat e tyre të vrasjeve në Bosnje. Të nderuar, si rezistenca paqësore dhe e armatosur kishte synim lirinë, pavarësinë dhe rendin demokratik të Kosovës. Pa atë rezistencë gjithëpopullore, Kosova s’do të ekzistonte fare. Qytetarët e Kosovës s’donin luftë, ishin të përkushtuar për paqe. Lufta  u imponua.Kosova ishte në anën e drejt të historisë”, ka theksuar tutje.

Pjesë shtesë nga fjala e Hashim Thaçit:

Jam i lumtur që populli i Kosovës jeton i lirë i pavarur me të drejta të barabarta për të gjithë qytetarët.

Kosova është rrëfim suksesi.

Gjatë këtij procesi do të udhëtojmë pas në ngjarje të para 25 viteve.

Duhet të keni parasysh se mbambendja e 25 viteve më parë është e mjegulluar. Realiteti po ngatërrohet me opinione dhe agjenda të ndryshme.

Spekulimet po shndërrohen në fakte. Gjithashtu mllefet politike nuk duhet të kuptohen si fakte në këtë sallë. Kjo vlen edhe për disa botime dhe opinione të pasluftës.

Si në çdo shoqëri demokratike edhe tek ne, jo çdo bashkëluftëtar, ka qenë edhe bashkëmendimtar dhe bashkudhëtar në procese te pasluftës.

Në raste jo të pakta, egoja tejkaloi të vërtetën për rrëfimin e UCK-së.

Njerëzit mbajnë mend atë që duan të besojnë se është e vërtetë, por kemi histori faktike të regjistruar në atë kohë. Të kthehemi në ato dëshmi, sepse aty është e vërteta.

Me vjen keq që s’mund të dëgjojmë dëshmitë e znj. Albriht, sekretarit Robin Cook, senatorit Rober Dole, Richar Holbrook-ut, shefit të parë të UNMIK-ut, presidentit Ibrahim Rugova, Fehmi Aganit e Adem Demacit.

Ata do të kishin dëshmuar për mua, për atë që kam thënë dhe bërë gjatë asaj kohe shumë të rëndësishme në historinë e lirisë.

Jam shumë i lumtur që shumë të tjerë si ata, vendor e ndërkombëtar, janë të gatshëm të dëshmojnë për pafajësinë time.

Ne besuam ën veten tonë për të qenë të lirë. Ne në Kosovë e dinim që pa ndihmën e ndërkombëtareve, veçanti SHBA-së s’do të mund të ishim të pavarur.

Kur raporti i Dick Martyt para 13 vitesh mbushi titujt e mediave ndërkombëtareve, me akuza të sajuar për trafik organesh nga UÇK dhe unë, unë kërkova që të hetohej në mënyrë të pavarur.

Bashkësia ndërkombëtare me tha që një gjykatë e veçantë ishte thelbësore për të hequr renë e zezë të akuzave për trafik të organeve në Kosovë. Bota tani e di, sot si rezultat i këtij procesi se nuk kishte trafik organesh dhe se shtëpia e verdhe s’ka ekzistuar kurrë.

E dimë se populli i Kosovës, UCK-ja, dhe gjithë populli shqiptarë edhe unë, jemi shfajësuar nga këto akuza. E vërteta është thënë dhe reja e zezë mbi Kosovën është hequr. Kjo sakrificë ja ka vlejtur. Unë pres të shfajësohem edhe nga çdo akuzë tjetër.

Unë jam intervistuar nga gjithë mekanizmat ndërkombëtar, qoftë si dëshmitar apo i dyshuar. Çdo bashkëpunim i imi ka qenë në interes të drejtësisë, dhe plotësisht transparent, qoftë në Prishtinë qoftë në Hagë. Gjithçka çka thuhet tjetër është e paqëndrueshme.

Prandaj askush s’mund ta shkruaj historinë. Ky është çmimi i lirë. Besoj në paqe, pajtim dhe drejtësi.

Besoj se ky proces do të jetë i drejt transparent dhe i shpejt.