“Autorët hyn në Shqipëri si turistë”, policia jep detaje për ekzekutimin e Nikulajt: Ekzekutori, portugez! 6 shtetas në kërkim

Shqiperi

Gazeta Express

26/04/2023 18:14

Policia e Shtetit ka dalë në një konferencë për shtyp në lidhje me ngjarjen kriminale të ndodhur pak ditë më parë në Lezhë,  ku u vra Ardian Nikulaj.

Drejtori i Përgjithshëm i Policisë së Shtetit Muhamet Rrumbullaku, shprehet se kjo ngjarje është zbardhur dhe janë shpallur në kërkim ndërkombëtar 6 persona, mes tyre një me shtetësi shqiptaro-britanike, një portugez dhe 4 të tjerë britanikë, mes të cilëve edhe një grua.

“Janë dokumentuar veprimet e autorëve të dyshuar nga momenti i organizimit dhe dinamikat e përshkruar nga shtetasit e përfshirë. Nga veprimet janë siguruar provat që u përkasin këtyre autorëve. Për kryerjen e krimit, është dokumentuar përdorimi i tyre për një periudhë kohore të gjatë para kryerjes së vrasjes. Janë caktuar masat e sigurisë për 6 shtetas të dyshuar si autorë për vrasjen.

E.H, me shtetësi shqiptare dhe britanike

R.R.S, shtetas portugez

H.H shtetas britanik

H.B shtetase britanike

TH.M shtetas britanik

S.P.H shtetas britanik”-tha Rrumbullaku.

Sipas Rrumbullakut këta shtetas kanë hyrë në Shqipëri si turistë, dhe menjëherë pas vrasjes së Nukulajt janë larguar nga vendi.

“Ju bëra të qartë klasifikimin, që ka të bëjë me vrasje me paramendim për çështjeje gjakmarrjeje. Autorët pas kryerjes së krimit kanë dalë jashtë territorit  të Shqipërisë.Nga hetimet, jemi para një organizmi pasi kemi të bëjmë me shtetas të huaj, të cilët kanë hyrë si vizitorë në Shqipëri dhe tani i qëndrojmë parime që krimit nuk njeh kufi”, tha Rrumbullaku.

Sa i përket motiveve, kreu i policisë së shtetit tha se pas saj qëndron gjakmarrja.

“Prokuroria pranë gjykatës së shkallës së parë Lezhë ka regjistruar procedimin penal, për veprën penale “vrasje për motive gjakmarrje e kryer në formën e grupit të sturkturuar kriminal” dhe “mbajtje pa leje të armëve shpërthyese dhe municioneve luftarake”, tha ai.

Sa i takon ekzekutorit, Rrumbullaku konfirmoi se ai është shtetasi portugez.

“Në lidhje me sigurimin e provave ju garantoj se kemi siguruar prova të plota që definitojnë plotësisht autorësinë, rolet e personave të dyshuar. Jemi në një fazë të dytë në terren me partnerët për kapjen e tyre”, shtoi kreu i policisë.

/Gazeta Express