Ekipi i Serie C reagon rreth zhvillimeve për Superligën Evropiane, thotë se s’mori ftesë

Futboll

Gazeta Express

21/12/2023 16:42

Klubi italian i kategorisë së tretë, Pescara Calcio ka reaguar lidhur me një qëndrim zyrtar rreth “bombës” së hedhur sot nga nga Gjykata e Drejtësisë e Bashkimit Evropian, e cila vendosi në dobi të Superligës Evropiane, e cila synohet të themelohet nga klubet e mëdha evropiane, mbi të gjitha nga Real Madridi dhe nga Barcelona, që janë të vetmet që iu mbijetuan kërcënimeve të UEFA-s.

Ekipi i Serie C u shpreh se nuk ka marrë ndonjë ftesë për pjesëmarrje në këtë ligë dhe nuk do të japë ndonjë koment.

“Pescara Calcio njofton se pasi nuk ka marrë asnjë ftesë në Superligë, nuk do të bëjë asnjë deklaratë për këtë çështje”, thuhej në njoftimin e tyre.

Ky reagim i tyre është për humor, pasi që ekipet pjesëmarrëse në Superligën Evropiane potenciale do të jenë nga elitat e ligave më të forta evropiane.