Messi dhe Inter Miami e shijojnë humbjen e parë të sezonit

Futboll

Gazeta Express

03/04/2025 8:31

Los Angeles FC i dha Lionel Messit dhe Inter Miamit humbjen e tyre të parë të sezonit të mërkurën, duke siguruar një fitore surprizë 1-0 në ndeshjen e parë çerekfinale të Kupës së Kampionëve të CONCACAF.

Një gol në minutën e 57-të nga Nathan Ordaz, lojtar i kombëtares së El Salvadorit i lindur në Los Angeles, i dha LAFC një avantazh të çmuar përpara ndeshjes së kthimit të mërkurën e ardhshme në Florida.

Të pamposhtur në nëntë ndeshje në të gjitha kompeticionet që nga fillimi i sezonit, Messi dhe Miami mbërritën në Los Angeles si skuadra më në formë e Major League Soccer.

Por pas një pjese të parë të kujdesshme, ku asnjëra skuadër nuk arriti të dominonte, Los Angeles rriti intensitetin pas pushimit dhe menjëherë filloi të krijonte probleme për miqtë.

Mbrojtësi i LAFC, Ryan Hollingshead, shpërdoroi një mundësi të artë në minutën e 54-t, duke gjuajtur shumë larg portës pasi depërtoi në zonë nga krahu.

Tre minuta më vonë, ata arritën golin vendimtar, kur sulmuesi 21-vjeçar Ordaz u shkëput nga ish-mesfushori i Barcelonës dhe Spanjës, Sergio Busquets, dhe goditi fort në cepin e poshtëm të portës, duke mposhtur portierin e Miamit, Oscar Ustari.

Superylli argjentinas Messi, i cili luajti për herë të parë si titullar pas rikthimit nga një dëmtim dyjavor, e pati të vështirë të linte gjurmë në ndeshje.

Në vend të tij, ishte Los Angeles që dukej më i rrezikshmi përpara një turme entuziaste prej 22,207 tifozësh në BMO Stadium, mes të cilëve ndodheshin ylli i NBA-së Stephen Curry, pronari i Inter Miami David Beckham dhe trajneri i kombëtares së Argjentinës, Lionel Scaloni.