Dhoma e Tregtisë: Taksa e SHBA-së do ta rëndojë edhe më shumë ekonominë tonë, qeveria t’i ndihmojë bizneset e prekura

Lajme

Gazeta Express

03/04/2025 11:14

Dhoma e Tregtisë dhe Industrisë në Kosovë tha se e ka pritur me shqetësim vendimin e presidentit amerikan Donald Trump që t’i vendosë eksporteve nga Kosova taksën prej 10%.

“Ky vendim pritet ta godasë edhe më shumë eksportin, i cili nga Kosova drejt SHBA-së ka pasë ulje përgjatë muajve të fundit”, thuhet në reagimin e Dhomës së Tregtisë.

Duke cituar të dhënat e Agjencisë së Statistikave të Kosovës, DHTI thotë se në dhjetor 2024, eksportet nga Kosova ishin 3.5%, përderisa në muajin janar dhe shkurt 2025, ato ranë në 2.8, përkatësisht 2.5% në muajin shkurt të këtij viti.

“Dhoma e Tregtisë dhe Industrisë Kosovë ka kohë që ka alarmuar për një vendim të tillë dhe ka kërkuar nga institucionet që të shfrytëzojnë kanalet diplomatike për të mos ndodhur ky vendim”.

Dhoma e Tregtisë dhe Industrisë i bëri thirrje që t’u dalë në ndihmë bizneseve që preken nga ky vendim.

Presidenti amerikan Donald Trump dje vendosi një tarifë prej 10% për të gjitha importet në SHBA, përfshirë edhe Kosovës. Ndërsa tarifa më të larta ai vendosi për vendet që ai i quan “shkelësit më të këqij”, në një moment vendimtar për tregtinë globale./Express/