Rama: BE na surprizoi me vullnetin për të na pranuar. Objektiv, hapja e të gjithë grupkapitujve brenda vitit

Shqiperi

Gazeta Express

04/04/2025 12:32

Kryeministri Edi Rama deklaroi sot se Shqipëria ndodhet në një moment të favorshëm historik për integrimin në Bashkimin Europian, duke theksuar se Brukseli ka treguar një vullnet të qartë për ta pranuar vendin brenda “kështjellës” së BE-së.

Në takimin inaugurues të Komitetit të Përbashkët Konsultativ me Komitetin Ekonomik dhe Social Europian, Rama tha se për herë të parë “yjet janë rreshtuar në një vijë” mes Shqipërisë dhe BE-së. “Ky është një shans që nuk duhet humbur – synimi ynë është që të hapim të gjithë grupkapitujt brenda këtij viti”, u shpreh ai.

Kryeministri iu përgjigj edhe kritikëve që e cilësojnë retorikën e tij si propagandë:

“Thonë se është iluzion, por këta njerëz nuk janë të informuar. Mali i Zi i ka hapur negociatat në 2012, Serbia në 2014, ndërsa ne jemi sot në pararojë. Kemi çelur negociatat vitin e kaluar dhe këtë vit kemi një shans real për t’i çuar përpara të gjithë grupkapitujt.”

Ndërkohë, Presidenti i Komitetit Ekonomik dhe Social të BE-së, Oliver Röpke, vlerësoi performancën e Shqipërisë në procesin e integrimit:

“Shqipëria ka bërë hapa të jashtëzakonshëm përpara. Jeni bërë tashmë një partner i vërtetë, një vend që dëgjohet dhe që respektohet në strukturat e BE-së. Jam krenar që Komiteti Ekonomik dhe Social ka qenë gjithmonë mbështetës i kësaj rruge.”

Sipas Röpke, angazhimi i institucioneve dhe i shoqërisë civile ka qenë çelësi i këtij progresi:

“Përfshirja e shoqërisë civile në procesin e integrimit nuk është vetëm një domosdoshmëri teknike – është garancia më e mirë për demokracinë dhe për një të ardhme të qëndrueshme në BE.”

Kryenegociatorja Majlinda Dhuka u shpreh gjithashtu optimiste, duke theksuar se Shqipëria po përparon në mënyrë të qëndrueshme drejt anëtarësimit:

Rama përfundoi me një paralajmërim miqësor për rrugën që mbetet përpara:

“Fundi është pozitiv, por rrugëtimi është i dhimbshëm. Dhe kjo është arsyeja pse përgëzoj BE-në – jo vetëm për vullnetin, por edhe për durimin.”