Zgjedhjet e 11 majit, miratohet sasia e fletëve të votimit brenda vendit

Shqiperi

Gazeta Express

04/04/2025 13:01

Komisioneri Shtetëror i Zgjedhjeve, Ilirjan Celibashi, miratoi sot projektvendimin për prodhimin e fletëve të votimit për zgjedhjet parlamentare që do të mbahen më 11 maj 2025. Sipas vendimit të miratuar, në total do të prodhohen 3,534,792 fletëvotime për zgjedhësit brenda vendit.

KQZ ka parashikuar që numri i fletëve të votimit të jetë i barabartë me numrin e zgjedhësve të regjistruar, duke shtuar 2% më shumë për mbulim të çdo mundësie. Sipas të dhënave nga Drejtoria e Përgjithshme e Gjendjes Civile, numri i zgjedhësve për zgjedhjet e 11 majit 2025 është 3,467,972, ndërsa do të ketë gjithsej 93 KZAZ dhe 5225 Qendra Votimi në të gjithë territorin e Shqipërisë.

“KQZ dërgon në selinë e KZAZ-ve të ndara në kuti të veçanta për çdo qendër votimi edhe numrin e nevojshëm të fletëve të votimit, duke përfshirë edhe shtesën prej 2% mbi numrin e zgjedhësve për çdo qendër votimi,” tha KQZ në njoftimin e saj.

Po ashtu, u miratua gjithashtu projektvendimi për caktimin e numrit të Komisioneve të Administrimit, Numërimit dhe Vlerësimit të Votave nga Jashtë (KANVVJ) dhe grupeve të numërimit të votave jashtë vendit (GNVJ). Celibashi theksoi se do të ngriten komisione për administrimin dhe numërimin e votave për çdo qark, duke specifikuar se për disa qarqe do të ketë komisione të përbashkëta.

Për shembull, një komision do të ngrihet për Tiranën dhe Fierin, ndërsa për Elbasan dhe Kukës, Durrës dhe Gjirokastër, Korçë dhe Dibër, Vlorë dhe Lezhë, dhe Shkodër dhe Berat do të krijohen komisione të përbashkëta. Në total do të ketë 37 grupe numërimi për zgjedhjet e ardhshme.

“Do të ketë 4 grupe numërimi për qarkun Elbasan dhe 1 për Kukës, ndërsa çdo qark tjetër do të ketë grupe të caktuara në përputhje me popullatën dhe nevojat,” sqaroi KQZ.