Konflikti për një ‘follow’ ndaj një vajze në rrjete sociale përfundon me kërcënim me armë në Ferizaj

Lajme

Gazeta Express

04/04/2025 23:28

Një përplasje mes dy të rinjve në fshatin Dubravë të Ferizajt ka përfunduar me kërcënim me armë zjarri dhe ndërhyrje të njësisë antidrogë të Policisë së Kosovës.

Sipas njoftimit të Policisë, incidenti ka ndodhur rreth orës 17:20, kur pas një fjalosjeje mes dy personave ka ndërhyrë njësia antidrogë, ndërsa në asistim ka mbërritur edhe patrulla e stacionit policor të Ferizajt.

Gjatë kontrollit ndaj të dyshuarit R.O., 19 vjeç, është gjetur dhe sekuestruar një armë zjarri, një karikator dhe një fishek në tytë. Në vendin e ngjarjes kanë dalë hetuesit dhe krimteknikët për procedurat e mëtejme hetimore.

Hetimet paraprake kanë zbuluar se konflikti kishte nisur pas “follow” të dërguar nga i riu Z.M., 20 vjeç, një vajze në rrjetet sociale. Si pasojë, R.O. e kishte thirrur Z.M.-në dhe e kishte kërcënuar me armë.

Me urdhër të prokurorit të shtetit, ndaj të dyshuarit R.O. është iniciuar procedurë penale për veprat “Armëmbajtje pa leje” dhe “Kanosje”, ndërsa ai është ndaluar për 48 orë.

Policia ka bërë të ditur se hetimet lidhur me rastin po vazhdojnë.