Paris Guri: Amerika është pjesë e rritjes e kujtimeve tona, Hekuran hiqe taksën

Lajme

Gazeta Express

05/04/2025 14:26

Deputeti i zgjedhur i LDK-së, Paris Guri, i ka kërkuar ministrin në detyrë të Financave, Hekuran Murati, heqjen e taksës për 10% ndaj produkteve që vijnë nga SHBA.

Meqënëse Murati vjen nga qyteti i Ferizaj, Guri thotë se askush më mirë se ai “nuk do të duhej ta kuptonte rëndësinë e Shteteve të Bashkuara të Amerikës”.

Kjo, sipas Gurit, jo vetëm për shkak të rëndësisë që ka SHBA-ja për Kosovën në rrugën e saj të shtetndërtimit, por edhe për lidhjen që amerikanët në Kosovë, sidomos në Ferizaj, kanë krijuar me vendasit.

“Le ta lëmë për një moment anash rolin vendimtar të Amerikës në çlirimin, pavarësimin, zhvillimin dhe njohjen e Kosovës. Hekuran Murati vjen nga qyteti i Ferizajt — qytet që ka fatin të jetë nikoqir i bazës më të madhe ushtarake amerikane në vend. Kjo bazë ka ndërtuar qindra kilometra rrugë, ka ngritur spitale e shkolla, ka organizuar aktivitete kulturore, kurse të gjuhëve të huaja, teknologjisë dhe edukimit”.

“E mbaj mend veten si një fëmijë pesëvjeçar. Emailin e parë ma hapi një ushtar amerikan — jo vetëm mua, por gjithë fëmijëve të lagjes. Kompjuterin për herë të parë e kam prekur po falë tyre. Filmat e parë të animuar në gjuhën angleze i kemi parë si dhuratë prej ushtarëve amerikanë. Madje edhe topin e parë të futbollit origjinal e morëm nga dy ushtarë, Dustin dhe Tom, me të cilët ende ruaj kontakte”.

Amerika për ne, thotë Guri, nuk është thjesht aleate strategjike –  “ajo është pjesë e rritjes sonë, e kujtimeve tona, e formimit tonë si qytetarë të lirë”.

“Për Ferizajn — dhe për gjithë Kosovën — Amerika nuk është vetëm mbështetje për liri, siguri dhe zhvillim. Është edhe lidhje zemre, kujtese e gjallë dhe krenari që s’fshihet. HEKURAN, HIQE TAKSËN!”.

Taksa ndaj produkteve të SHBA-së që rrallë kush e dinte se ekzistonte u bë temë në Kosvoë pasi SHBA tarifoi Kosovën si pjesë e tarifave që presidenti amerikan Donald Trump ndërmori ndaj mallrave që hyjnë në SHBA nga të gjitha vendet e huaja.

Tarifa prej 10% që iu vu Kosovës është minimalja krahas shifrave të tjera që Trump iu vendosi disa shteteve si masë reciprociteti./Express/