Vdekja e Papa Françeskut, ku do të varroset dhe kur mblidhen kardinalët për ta zgjedhur prijësin e ri të Kishës

Lajme

Gazeta Express

21/04/2025 12:40

Agjencia ndërkombëtare e lajmeve, Reuters tregoi se çfarë ndodh tash në Kishën Katolike Romake pas vdekjes së Papa Françeskut, e cila u njoftua nga Vatikani të hënën. Ritet shënojnë fundin e një papati dhe fillimin e tjetrit:

– Kamerlengu i papës (kryekamarieri), Kardinali Kevin Farrell, konfirmon zyrtarisht vdekjen. Ai më pas vulos apartamentin privat të papës dhe përgatit funeralin.

– Kamerlengu dhe tre ndihmës vendosin kur arkivoli i papës do të dërgohet në Bazilikën e Shën Pjetrit për homazhe publike. Ata gjithashtu sigurohen që “Unaza e Peshkatarit” dhe vula prej plumbi e papës të thyhen që të mos mund të përdoren nga askush tjetër. Nuk kryhet autopsi.

– Ritet e zisë zgjasin nëntë ditë, me datën e funeralit dhe varrimit që caktohet nga kardinalët. Funerali normalisht zhvillohet katër deri në gjashtë ditë pas vdekjes, në Sheshin e Shën Pjetrit. Françesku kishte thënë se, ndryshe nga shumë paraardhës, nuk do të prehej në kriptën e Bazilikës së Shën Pjetrit, por në Bazilikën e Shën Mërisë së Madhe në Romë. Ai gjithashtu kishte kërkuar të varrosej në një arkivol të thjeshtë prej druri.

– Kolegji i Kardinalëve mbikëqyr çështjet e përditshme gjatë periudhës së ndërmjetme. Ata kanë fuqi të kufizuara dhe pjesa më e madhe e administratës qendrore të Kishës ndalet.

– Konklava për ta zgjedhur papën e ri fillon në Kapelën Sistine të Vatikanit mes 15 dhe 20 ditë pas vdekjes. Kardinalët, të cilët qëndrojnë të mbyllur në Vatikan gjatë gjithë kohës së konklavës, vendosin për datën e saktë.

– Të gjithë kardinalët nën moshën 80 vjeç mund të marrin pjesë në votimin sekret. Nevojitet një shumicë prej të paktën dy të tretave plus një për ta zgjedhur papën e ri, kështu që votimi mund të zgjasë disa runde dhe disa ditë. Kur përfundon zgjedhja, papa i ri pyetet nëse e pranon dhe çfarë emri dëshiron të marrë.

– Bota mëson se është zgjedhur një papë kur një zyrtar djeg fletët e votimit me kimikate të posaçme për të krijuar tym të bardhë që del nga oxhaku i Kishës. Përdoren kimikate të tjera për të krijuar tym të zi që tregon një votim jopërfundimtar.

– Dekani i Kolegjit të Kardinalëve del në ballkonin qendror të Bazilikës së Shën Pjetrit për të shpallur “Habemus Papam” (Kemi një papë). Papati i ri më pas shfaqet dhe i jep bekimin e tij turmës në shesh.