Buffon bën me dije se çka i duhet Italisë në kualifikimet e Botërorit

Sport

Gazeta Express

28/04/2025 17:21

Shefi i Delegacionit të Italisë, Gigi Buffon, mendon se Azzurrët do të duhet të tregojnë “pak arrogancë” në kualifikueset e Kupës së Botës, veçanërisht në sfidën e madhe ndaj Norvegjisë së Erling Haaland në qershor.

Italia nis fushatën e saj kualifikuese më 6 qershor, në transfertë kundër Norvegjisë, që ka fituar tashmë dy ndeshjet e para në Grupin I.

“Ka një Kupë Bote për t’u kualifikuar, është objektivi kryesor,” tha Buffon për gazetarët nga Coverciano, sipas TMW.

“Na pret një ndeshje shumë e rëndësishme në qershor. Në një moment të caktuar, duhet të tregosh pak çmenduri të shëndetshme dhe pak arrogancë që na bën të themi: ‘Ne jemi Italia’, ashtu siç bëmë në Francë pas Europianit. Duhet të paraqitemi dhe të themi: ‘Ne duam Kupën e Botës, pa marrë parasysh kë kemi përballë.’”

Italia reagoi pas eliminimit zhgënjyes në Euro 2024 me një fitore kundër Francës në Ligën e Kombeve në shtator, por më pas u eliminua nga Gjermania në çerekfinale.

Sot, Buffon u nderua me një çmim karriere nga USSI në Firence.

“Faleminderimi im shkon për futbollin dhe botën e lojës,” shtoi ai.

“Vetëm në fushë e gjeta lumturinë e vërtetë; aty mund të shprehesha me të vërtetë. Pastaj është jeta, ku përpiqesh të mos shkaktosh dëm dhe të jesh shembull i mirë. Ky është trashëgimia që lanë Gigi Riva dhe Gianluca Vialli si Shefa të Delegacionit të Azzurrëve.”

Riva ishte Shefi i Delegacionit në Kupën e Botës 2006, që Buffon e fitoi me Italinë, ndërsa Vialli e mbajti këtë rol në Euro 2020, si pjesë e stafit të Roberto Mancinit, mikut dhe ish-shokut të tij te Sampdoria.

“Janë shumë pak njerëz në futboll që i admiroj si njerëz, dhe Riva e Vialli ishin shembuj të jashtëzakonshëm,” përfundoi Buffon.

“Unë duhet të jem i qetë, kurrë nuk mund t’u afrohem apo t’i kaloj ata. Më kanë mësuar gjithmonë të jap çfarë kam, dhe këtë e bëj pa asnjë maskë. Shpresoj të jetë e mjaftueshme.”

Ndërkohë, trajneri i Atalantës, Gian Piero Gasperini, u shpall sot nga USSI si trajneri më i mirë në Serie A për sezonin 2023–24./GazetaExpress/