A po i afrohet ASH-ja BDI-së? Taravari: Do të dëgjojmë anëtarësinë

Maqedoni

Gazeta Express

03/04/2025 16:06

Aleanca për Shqiptarët, krahu i Arben Taravarit mbrëmë në Tetovë ka mbajtur mbledhje të rregullt të kryesisë në të cilin është diskutuar për aktualitetin politik, me fokus bisedimet me koalicionin VLEN në lidhje me pjesëmarrjen në zgjedhjet lokale të tetorit, shkruan Alsat.

Sot, Taravari refuzoi të përgjigjet për epilogun e mbledhjes, duke paralajmëruar detaje për ditën e nesërme. Mbrëmë Taravari tha që tash për tash nuk do të largohet nga koalicioni VLEN, megjithatë deputetët e partisë janë duke zhvilluar negociata dhe nëse nuk arrihet marrëveshje, opsioni i dytë është që vetë të dalë në zgjedhje.

“Tash për tash, jo. Grupet punues mes deputetëve ende janë në negociata. Kështu që, shpresoj që të gjejnë gjuhë të përbashkët. Në qoftë se nuk gjejnë atëherë shohim si e bëjmë”, tha Arben Taravari, Aleanca për Shqiptarët.

I pyetur për informatat që qarkullojnë nëpër media dhe kuluaret partiake për mundësinë e bashkëpunimit me BDI-në në zgjedhjet lokale, Taravari nuk mohon kategorikisht, por thotë se duhet të shihet disponimi i anëtarësisë.

“Unë mendoj se Aleanca për Shqiptarët në qoftë se s’del me VLEN-in opsion të dytë e ka të del vet në zgjedhje dhe ky është opsioni i dytë, por ta shohim edhe disponimin si janë mes anëtarësisë, mes anëtarëve të kryesisë, mes anëtarëve të Kuvendit. Për mua është shumë me rëndësi zëri i qytetarit dhe zëri i anëtarësisë”, u shpreh Arben Taravari, Aleanca për Shqiptarët.

Për më 6 prill është paralajmëruar se do të mbahet Kuvendi i ASH-së dhe sipas të gjitha gjasave duhet të merret vendimi final nëse do të garojë në zgjedhje lokale vetëm apo me koalicionin. Ditë më parë intervista e Taravarit për “360 Gradë” shkaktoi reagime të shumta. Në të deklaroi se shihet prej 100 kilometrash që koalicioni VLEN nuk funksionon.

Ndërsa qytetarët, kanë përshtypje se VLEN ka pozitë të dobët në qeveri. Megjithatë, Taravari me tone vetëkritike, disa herë përsëriti se fajet për këtë nuk i ka as VMRO-ja e as kryeministri Hristijan Mickoski, por vetë VLEN-i. Ai nuk tregoi nëse këtë perceptim e kanë edhe partitë e tjera përbërëse të VLEN, megjithatë, tha se sipas anketave që ai posedon, 2/3 e shqiptarëve kanë pakënaqësi. Por, pavarësisht dallimeve në VLEN, Taravari më pas deklaroi se nuk e ka ndërmend ta braktisë Qeverinë.