Abdixhiku udhëton në Valencia të Spanjës, merr pjesë në Kongresin e EPP

Lajme

Gazeta Express

28/04/2025 19:43

Kryetari i Lidhjes Demokratike të Kosovës, Lumir Abdixhiku, ka udhëtuar sot drejt Valencias, Spanjë, ku do të marrë pjesë në Kongresin e Partive Popullore Evropiane (EPP), ku bëjnë pjesë parti të qendrës së djathtë në Evropë.

Siç njofton LDK, gjatë qëndrimit në këtë ngjarje politike, Abdixhiku do të zhvillojë një sërë takimesh bilaterale me liderë të shumtë evropianë, anëtarë dhe aleatë të EPP-së. Ai do të diskutojë mbi zhvillimet aktuale në Kosovë, proceset integruese evropiane, si dhe mbi përforcimin e bashkëpunimit ndërpartiak në nivel kontinental.

Në kuadër të Kongresit, Abdixhiku do të mbajë gjithashtu një fjalim para delegatëve, ku “do të prezantojë vizionin e LDK-së për të ardhmen e Kosovës si pjesë të pandashme të familjes evropiane”.

“Pjesëmarrja e LDK-së në këtë kongres vjen si dëshmi e fuqizimit të pozitës së saj në arenën ndërkombëtare dhe angazhimit të saj të palëkundur për integrimin evropian të Kosovës”, thekson ky subjekt.