Akuzohet për bashkëpunim me grupet kriminale, GJKKO lë në burg ish-efektivin e RENEA-s

Shqiperi

Gazeta Express

05/04/2025 13:25

Në Gjykatën e Posaçme u zhvillua seanca për verifikimin e masës së sigurimit për ish-efektivin e RENEA-s Altin Morina i shpallur në kërkim në kuadër të operacionit të koduar “Revanshi”.

Gjykata la në fuqi masën e sigurisë “arrest me bug”.

Morina u arrestua një ditë më parë, 4 prill, dhe me vete kishte edhe një pistoletë pa leje.

Ish-polici ishte i shpallur në kërkim për veprën penale të kultivimit të bimëve narkotike në kuadër të grupit të strukturuar kriminal.

Në komunikimet në Sky ECC dyshohet se ky i fundit ka bashkpunuar me të fortin e Niklës, Durim Bami në lidhje me këtë çështje.

Sipas dosjes së SPAK, ish-efektivi i Forcave Speciale, akuzohet se bashkëpunonte me Durim Bamin për kultivimin e bimëve narkotike në zonën e Niklës dhe Tapizës.

Emri i tij doli në skenë pas operacionit Revanshi ku u goditën 7 grupe kriminale dhe u lëshuan 50 urdhër-arreste.

Sipas hetimeve, dyshohet se Morina duke shfrytëzuar postin e tij brenda policisë, ka ndihmuar grupet kriminale dhe Durim Bamin për kultivimin e kanabisit, ku ndër të tjera besohet se ai paguhej nga bota e krimit edhe për dhënien e informacioneve sekrete.

Altin Morina u arrestua edhe në mars të vitit 2023, pasi në makinën me të cilën po lëvizte në zonën e Kodrës së Diellit iu gjetën 113 mijë euro.

Në prill të atij viti ai u lirua nga Gjykata dhe u la me detyrim paraqitje pasi paraqiti përpara togave të zeza faturën që tregonte se ia kishte marrë paratë një biznesmeni për problemet e tij personale. Në atë kohë, policia kishte dyshime se ai kishte lidhje me grupin kriminal të Ervis Martinajt.