Apeli i GJKKO i shton dënimin ish-kryebashkiakut Fatos Tushe

Shqiperi

Gazeta Express

01/03/2023 11:21

Apeli i Gjykatës Kundër Korrupsionit dhe Krimit të Organizuar ka dënuar me 5 vite burg ish-kryetarin e Bashkisë së Lushnjes, Fatos Tushe duke e shpallur fajtor atë edhe për akuzën e shkeljes së barazisë në tendera. Por për shkak të gjykimit të shkurtuar Tushe përfiton ulje me 1/3 e dënimit dhe masa e dënimit i shkon në 3 vjet e 4 muaj burg.

“Në përfundim, Gjykata e Posaçme e Apelit për Korrupsionin dhe Krimin e Organizuar vendosi:

Lënien në fuqi të vendimit nr. 47, datë 29.07.2022 të Gjykatës së Posaçme të Shkallës së Parë për Korrupsionin dhe Krimin e Organizuar me ndryshimet si më poshtë vijon:

Lënien në fuqi të vendimit nr. 47, datë 29.07.2022 të Gjykatës së Posaçme të Shkallës së Parë për Korrupsionin e Krimin e Organizuar me ndryshimet si më poshtë vijon:

Deklarimin fajtor të të pandehurit z. F.T. për kryerjen e veprës penale “Shkelje e barazisë së pjesëmarrësve në tendera apo ankande publike” e kryer në bashkëpunim, sipas nenit 258 dhe 25 të Kodit Penal, dhe dënimin e tij me 2 vjet burgim. Në bazë dhe për zbatim të nenit 55 të Kodit Penal, pas bashkimit të dënimeve, caktimin si një dënim të vetëm për të pandehurin z. F.T. të masës 5 vjet burgim. Në bazë dhe për zbatim të nenit 406 të Kodit të Procedurës Penale, pas zbritjes me 1/3 e dënimit, caktimin si dënim përfundimtar ndaj të pandehurit z. Fatos Tushe të masës 3 vjet dhe 4 muaj burgim”, thuhet në një njoftim.

Tushe u arrestua me 6 korrik 2021, me ish-vartësit e tij, nga një operacion i ndërmarrë nga SPAK, për akuzën e shpërdorimit të detyrës për një tender me vlerë rreth 24 mln lekë për rehabilitimin e një kanali ujitës. Kujtojmë që Shkalla e Parë e Gjykatës së Posaçme e dënoi Tushen me 2 vjet e 4 muaj heqje lirie. /Gazeta Express