Arrestimi i gazetarit suedez, Turqia lëshon akuza për terrorizëm e thotë se ai e “fyu” Erdoganin

Lajme

Gazeta Express

30/03/2025 16:37

Një gazetar suedez që u ndalua sapo mbërriti në Turqi për t’i mbuluar protestat kundër burgosjes së kryetarit të Stambollit është arrestuar për akuza të lidhura me terrorizmin dhe për “fyerje të presidentit”, tha presidenca turke.

Joakim Medin, i cili punon për gazetën Dagens ETC, “është arrestuar për akuzat e ‘anëtarësimit në një organizatë të armatosur terroriste’ dhe ‘fyerjes së presidentit’”, tha presidenca të dielën, shkruan The Guardian.

Medin u ndalua të enjten kur avioni i tij u ul në Turqi dhe u dërgua në burg të nesërmen.

Në një buletin të publikuar nga “qendra e saj për luftën kundër dezinformimit”, presidenca tha se Medin ishte “i njohur për lajmet kundër Turqisë dhe afërsinë e tij me organizatën terroriste PKK”, grupin e ndaluar militant kurd.

“Ky vendim arrestimi nuk ka absolutisht asnjë lidhje me aktivitetet gazetareske”, shtoi ajo.

Kryeredaktori i gazetës, Andreas Gustavsson, i përshkroi akuzat si “absurde”, duke i thënë agjencisë së lajmeve AFP se “ushtrimi i gazetarisë nuk duhet të jetë një krim”.

Ministrja e Jashtme suedeze, Maria Malmer Stenergard, i tha radios publike se çështja e tij është “prioritet absolut” dhe u zotua se do ta diskutonte atë me homologun e saj turk.

Burgosja e Medin ndodhi vetëm disa orë pasi autoritetet liruan të fundit nga 11 gazetarët e arrestuar në bastisjet e së hënës në mëngjes për mbulimin e protestave, duke përfshirë fotografin e AFP-së, Yasin Akgul. Ai u lirua të enjten.

Autoritetet turke gjithashtu dëbuan gazetarin e BBC-së, Mark Lowen, i cili i kishte mbuluar protestat, pasi e mbajtën për 17 orë të mërkurën, duke thënë se ai përbënte “kërcënim për rendin publik”, tha transmetuesi.

Drejtoria turke e komunikimit tha se Lowen ishte dëbuar “për shkak të mungesës së akreditimit”.

Prokurorët turq hapën një hetim për Medin në vitin 2023 për një protestë në të cilën ai mori pjesë në Stokholm, ku një kukull e Presidentit Recep Tayyip Erdogan u var nga këmbët, sipas deklaratës së presidencës të dielën.

Ajo tha se gazetari suedez ishte midis 15 të dyshuarve që besohet se kanë marrë pjesë, organizuar ose promovuar demonstratën.

Protesta zemëroi autoritetet turke, të cilat pretenduan se ajo ishte orkestruar nga anëtarë të PKK-së dhe e thirrën ambasadorin suedez në Ankara.