Arrestohen pesë të mitur në Gjilan, nën dyshimet se kanë kryer vjedhje në një market

Gazeta Express

18/12/2019 9:45

Policia e Kosovës në Gjilan ka bërë të ditë se ka arrestuar pesë të dyshuar për veprën penale grabitje, raporton Gazeta Express

Një rast “Grabitje” kishte ndodhur më 05 dhjetor 2019, në një shitore në rrugën “Raif Halimi” në Gjilan.

Gjatë këtij rasti dyshohet se tre persona të maskuar nën kërcënim të armës kishin arritur që të “grabisin”, nga kasa e shitores një shumë të konsiderueshme të hollash që gjendeshin aty.

Gjatë bastisjes së shtëpive dhe objekteve përcjellëse të të dyshuarve janë gjetur dhe sekuestruar disa dëshmi të cilat dyshohet se janë përdorur gjatë rastit të grabitjes.

Policia e Kosovës lidhur me rastin ka intervistuar disa dëshmitarë dhe ka grumbulluar prova materiale që besohet se lidhen me rastin. 

Pas arrestimit të pesë (5) personave të dyshuar që të gjithë të mitur shqiptar shtetas të Kosovës, ata janë intervistuar në prezencë të avokatëve mbrojtës dhe punëtorëve të Qendrës për punë Sociale, ku janë gjetur prova të qëndrueshme që besohet se të dyshuarit janë të involvuar në veprën penale “Grabitje”.

Me urdhër të Prokurorit të Prokurorisë Themelore-departamenti i Krimeve të Renda në Gjilan, tre nga pesë të dyshuarit janë ndaluar për 24 orë.

Rasti është duke u hetuar. /Express/