Babai i Yamal reagon pasi iu shpërndan pamje duke festuar me fanellë të Real Madridit

Futboll

Gazeta Express

27/04/2025 18:42

Mounir Nasraoui përfundoi në ekstazë pasi pa djalin e tij, Lamine Yamal, të mposhte Real Madridin në finalen e Kupës së Mbretit. Për më tepër, numri ’19’ i FC Barcelonës ishte kyç në fitimin e trofeut, duke dhënë dy asistime për Pedrin dhe Ferran Torresin.

Megjithatë, babai i anësorit të Barcelonës kishte nisur që në mëngjes të bashkohej me tifozët katalanas si një tifoz i zakonshëm. Falë rrjeteve sociale, u pa sesi shijonte atmosferën në Sevilla, mes flamujve blaugrana.

Para ndeshjes, Mounir Nasraoui tregoi se ishte mjaft i ngazëllyer për “El Clásico”: “Do të fitojmë. Nuk më intereson një, dy apo tre gola, do t’i shkatërrojmë.”

Pas përfundimit të finales së Kupës së Mbretit, familjarët e lojtarëve të Barcelonës zbritën në fushë për të festuar fitoren. Megjithatë, momenti u njollos nga një polemikë lidhur me akreditimet, e theksuar veçanërisht nga Pedri, i cili shfaqi pakënaqësinë e tij ndaj organizimit të Federatës Spanjolle.

“Ajo që është turp është të japësh vetëm 100 akreditime kur unë kam 30 të ftuar. Askush nga ne nuk kishte, sepse i kishin dhënë të tjerëve që të zbrisnin në fushë”, u ankua numri ‘8’ i Barcelonës para familjarëve të tij.

Larg gjithë kësaj polemike qëndronte babai i Lamine Yamalit, i cili u shfaq në një video që djali i tij e regjistroi nga fusha e “La Cartuja-s”: “Hej, jemi më të mirët. Lamine Yamal, në të mirë apo në të keq, gjithmonë. Dhe kjo është një dhuratë për babain.”

Përveç kësaj, ai gjeti një moment për të thumbuar ata që e kishin fyer më parë për festimin e fitoreve të Real Madridit kundër Barcelonës: “Edhe pse kam ndjekur Real Madridin, nuk më intereson. Mua ai që më jep bukë është Barça.”

E gjithë kjo polemikë lindi sepse ditët e fundit u bë virale një video e Mounir Nasraouit, ku ai shihej jashtë stadiumit “Santiago Bernabéu”, i veshur me fanellën e bardhë të Real Madridit dhe me një flamur në kokë.

A Real Madrid fan found this video on his phone where Mounir Nasraoui, Lamine Yamal's father, was with him at the Clasico in 2022. 🤣

pic.twitter.com/0ei8hwQ10W

— Football Tweet ⚽ (@Football__Tweet) April 18, 2025