Barazim në “San Siro” – Milan fiton një pikë pas rikthimit ndaj Fiorentinës

Futboll

Gazeta Express

05/04/2025 22:49

Një ndeshje e zjarrtë mes dy rivalëve për zonën evropiane përfundoi pa fitues në “San Siro”, ku Milan dhe Fiorentina ndanë nga një pikë pas një barazimi spektakolar 2:2. Kuqezinjtë arritën të rikuperojnë një disavantazh prej dy golash në pjesën e parë, por nuk mjaftoi për të marrë fitoren e shumëkërkuar.

Ndeshja nisi keq për skuadrën vendase, kur Malick Thiaw, në përpjekje për të larguar një top në zonë, shënoi autogol në minutën e 7-të, duke i dhënë epërsinë Fiorentinës. Vetëm tri minuta më vonë, ishte Moise Kean që realizoi golin e dytë dhe për t’i çuar miqtë në avantazh 0:2 që në minutën e 10-të.

Megjithatë, reagimi i Milanit nuk vonoi. Në minutën e 23-të, Tammy Abraham shënoi për kuqezinjtë, duke e rihapur ndeshjen dhe duke ndezur shpresat për një përmbysje.

Pjesa e dytë i takoi më shumë Milanit, që shtoi presionin ndaj portës së “Violas”. Në minutën e 64-të, Luka Jovic barazoi shifrat për 2:2

Pavarësisht tentativave në minutat e fundit, asnjëra skuadër nuk arriti të sigurojë fitoren, ndërsa rezultati i barabartë lë të dyja ekipet në pozita të vështira për garën në Evropë.

Fiorentina ruan vendin e gjashtë dhe pozicionin e fundit që çon në garat evropiane, ndërsa Milani mbetet jashtë zonës së kualifikimit për momentin dhe do t’i duhet të luftojë fort në javët e mbetura për të siguruar një vend në Evropë.