Barcelona rikuperon një lojtar të rëndësishëm para ndeshjes me Betisin, Hansi Flick konfirmon kthimin e Fermin Lopez

Sport

Gazeta Express

05/12/2025 14:15

Barcelona merr një lajm të mirë para sfidës së së shtunës ndaj Real Betis, pasi trajneri Hansi Flick ka konfirmuar rikthimin e mesfushorit Fermin Lopez, i cili ka qenë jashtë fushave që nga humbja ndaj Chelseat për shkak të një lëndimi muskulor.

Lopez është rikthyer në stërvitje gjatë javës dhe është i gatshëm për të luajtur, megjithëse sipas Flick, ai mund të nisë ndeshjen nga pankina.

Kthimi i tij vjen në një moment të rëndësishëm, pasi Dani Olmo është konfirmuar jashtë fushave për rreth një muaj pas një lëndimi në shpatull.

“Fermín mund të luajë, nuk jam i sigurt nëse do të jetë titullar, por jam i lumtur që është rikthyer. Dani Olmo është lojtar i mirë, por këto gjëra ndodhin, duhet ta menaxhojmë,” tha Flick para gazetarëve.

Trajneri gjerman dha edhe një tjetër lajm pozitiv: Frenkie de Jong është rikuperuar nga temperatura që e la jashtë ndeshjes me Atleticon dhe “ka stërvitur mirë dhe mund të luajë nesër.”

Barcelona përballet me Betisin të shtunën në mbrëmje, përpara se të kthehet në Camp Nou për ndeshjen e radhës në Champions League ndaj Eintracht Frankfurt. /GazetaExpress