Basha në Divjakë dhe Sauk: 100 milionë euro në vit për fermerët dhe pension minimal 250 euro

Shqiperi

Gazeta Express

07/04/2025 21:06

Kryetari i Koalicionit Euroatlantik, Lulzim Basha, ka vijuar turin elektoral me takime në Divjakë dhe në Sauk, ku ka shpallur dy nga zotimet kryesore të programit të tij: mbështetjen e drejtpërdrejtë për fermerët dhe rritjen e qëndrueshme të pensioneve.

Gjatë takimit me fermerët në Divjakë, Basha u njoh nga afër me vështirësitë që hasin bujqit. Ai akuzoi qeverinë për neglizhencë 12-vjeçare ndaj këtij sektori jetik për ekonominë.

“Fermerët shqiptarë janë të braktisur. Prodhimi u kalbet në rrugë sepse nuk ka treg, nuk ka mbështetje, nuk ka infrastrukturë,” tha Basha.

Ai prezantoi planin e Koalicionit Euroatlantik, që parashikon “100 milionë euro subvencione në vit dhe 50 milionë euro për infrastrukturën rurale, me qëllim që mbi 150 mijë familje fermerësh të dalin nga varfëria”.

“Pa ngritur bujqësinë, nuk ngrihet ekonomia. Pa ngritur fermerin, nuk ka mirëqenie. Ky është një bekim që duhet kthyer në zhvillim për të gjithë shqiptarët,” u shpreh ai.

Pas Divjakës, Basha u zhvendos në Sauk. Të moshuarit u ankuan për pensionet e ulëta dhe pamundësinë për të përballuar ilaçet dhe jetesën e përditshme.

“100 mijë lekë pension? A merr ilaçe, a pi një kafe? Leje më për dritat e ujin…” – u ankua një e moshuar.

Në përgjigje, Basha prezantoi planin për rritjen e pensioneve, i cili përfshin:

• Pension minimal prej 250 eurosh brenda dy viteve të para të qeverisjes;
• Pension mesatar prej 450 eurosh brenda mandatit të parë;
• Kompensim fiks mujor për ilaçet dhe energjinë elektrike për të gjithë pensionistët me të ardhura nën 300 euro;
• Reformë të re të sistemit të pensioneve, për një model të qëndrueshëm afatgjatë.

“Nuk është vetëm një premtim. Është një plan i realizueshëm, i bazuar në mundësitë reale të ekonomisë sonë dhe përvojën më të mirë ndërkombëtare,” theksoi Basha.