Basha prezanton kandidatët në Tiranë: Koalicioni Euroatlantik sjell politikën me njerëz të lirë dhe të pakorruptuar

Shqiperi

Gazeta Express

05/04/2025 13:54

Drejtuesi politik i Koalicionit Euroatlantik, Lulzim Basha, prezantoi këtë të shtunë kandidatët për deputetë për zonat zgjedhore 7 dhe 10 në Tiranë. Diana Toma, Shemsi Prençi, Eduard Kelmendi, Marçel Hila dhe Irsida Shehi do të përfaqësojnë këtë koalicion në garën e pritshme, e cila, sipas Bashës, nuk është vetëm zgjedhore, por edhe morale.

Në një takim me strukturat e degëve, Basha theksoi prioritetet e Koalicionit Euroatlantik në luftën kundër korrupsionit, duke e cilësuar këtë betejë si thelbësore për të ardhmen e vendit.

“Ne kemi dërguar në Kuvend projektligje të rëndësishme si vettingu i politikanëve, heqja e imunitetit të deputetëve, dhe mbështetja e SPAK-ut, por këto mbahen në sirtar prej një viti e gjysmë nga ata që bashkëpunojnë për të liruar të korruptuarit,” u shpreh Basha.

Ai foli gjithashtu për një nismë të re: krijimin e Njësisë së Rikuperimit të Pasurive të Vjedhura, një strukturë që sipas tij do të gjurmojë dhe kthejë tek qytetarët pasuritë e përvetësuara nga politikanët e korruptuar. “Do t’i ndjekim paratë, në Shqipëri e jashtë saj, sepse nuk janë pasuritë e tyre, janë të shqiptarëve,” tha ai.

Basha ironizoi edhe kundërshtarët politikë: “zëri im ‘O Rame, o Rame’ nuk u vjen si sirenë policie”.

“Kandidatët tanë janë njerëz të lirë, mbajnë kokën lart, nuk tremben, sepse nuk kanë asgjë për të fshehur. Janë të pakorruptuar dhe të pashantazhueshëm. Kjo na dallon,” përfundoi ai.