Berisha: Kultura do të ketë ministrinë e saj, dyfishim i buxhetit dhe Teatri Kombëtar siç ishte

Shqiperi

Gazeta Express

03/04/2025 14:44

Kryetari i Partisë Demokratike, Sali Berisha, ka paraqitur sot programin e PD-së për kulturën, duke e cilësuar situatën aktuale si më të rëndën që ka kaluar Shqipëria ndonjëherë. “Situata e kulturës shqiptare është më keq se në çdo pushtim që mund të ketë pasur Shqipëria”, deklaroi ai.

Një nga zotimet kryesore të Berishës ishte krijimi i një Ministrie të Kulturës më vete. “Do të ketë një ministri kulture me misionin më të rëndësishëm të zhvillimit, konsolidimit dhe mbrojtjes së kulturës kombëtare,” u shpreh ai.

Ai gjithashtu premtoi rritje të konsiderueshme të fondeve për artin dhe kulturën. “Qeveria do të rrisë kontributin, do të dyfishojë buxhetin për kulturën dhe artin,” tha Berisha.

Berisha garantoi se drejtuesit e institucioneve kulturore nuk do të caktohen politikisht, por do të zgjidhen nga vetë punonjësit e këtyre institucioneve. “Imagjinoni ju se çfarë batërdie është bërë me drejtimet. Merrni Operën dhe Baletin, sa herë ia ka ndryshuar drejtuesit. Të gjitha në funksion të parave,” deklaroi ai, duke shtuar se një qeveri e drejtuar nga PD-ja do të vendosë transparencë të plotë mbi fondet publike. “Borde që vendosin transparencë të plotë do të funksionojnë menjëherë pas 11 majit,” siguroi ai.

Një tjetër pikë e rëndësishme e programit të PD-së është lehtësimi i taksave për librin, për ta bërë atë më të aksesueshëm për lexuesit. “Ju nuk mund të imagjinoni taksat që janë të vendosura mbi librin, të cilat e largojnë me kilometra librin nga lexuesi për shkak të çmimeve të larta që imponojnë,” tha Berisha.

Ai gjithashtu propozoi një detyrim të ri për bibliotekat publike: “Rikthimi i detyrueshëm për të gjitha bibliotekat publike për të pasur librat që publikohen nga autorët shqiptarë, por edhe të autorëve të huaj.”

Në fjalën e tij, Berisha theksoi se Partia Demokratike do të angazhohet për rikthimin e Teatrit Kombëtar në formën e tij të mëparshme. “Qeveria do të rikthejë Teatrin Kombëtar siç ishte, si një simbol i rëndësishëm i kulturës dhe identitetit kombëtar,” tha ai.