Berisha marrëveshje me sindikatat: Brenda 100 ditëve të para nis rritja e pagave dhe pensioneve

Shqiperi

Gazeta Express

05/04/2025 12:53

Kryetari i Partisë Demokratike, Sali Berisha, firmosi një marrëveshje me sindikatat e Shqipërisë, përmes së cilës opozita angazhohet që brenda 100 ditëve të përmirësojë situatën ekonomike duke nisur nga rritja e pensioneve dhe pagave.

Mesazhi i parë që kryetari i PD-së, Berisha përcolli në këtë takim është vullneti i opozitës që, pas 11 majit, të mos ketë asnjë pension më të ulët se 200 euro.

“Nga ky minimum përfitojnë mbi 560 mijë pensionistë që janë me pensione të pjesshme”, tha Berisha.

Berisha premtoi edhe rritjen e pagës minimale në 3 muajt e parë të qeverisjes së PD-së.

“Por rrogë nën 500 euro nuk mund të ketë. Pas kësaj, ne do vendosim pagën për orë pune. Ne do ecim në rrugën që ecin vendet e lira”, tha kreu i opozitës.

Sipas kryetarit të PD-së, korrupsioni është arsyeja e vetme pse pagat e pensionet nuk janë rritur.

“Ky udhëton me avion, shpenzon 21 milionë euro me avion taksi në dispozicion, në një kohë kur kancelari i Austrisë udhëton me linjë tregtare. A kishit dëgjuar ndonjëherë ju të dashur miq, 10 mijë euro në muaj lavazhi i veturës së Lubi Ballukut? Imagjinoni ju se sa u dhimbset, se çfarë ndjenjash kanë këta për ata pensionistë që marrin 100 euro, 67 euro. Ata u duken miza, ata nuk ekzistojnë. Ata i ka verbuar luksi, i ka verbuar vjedhja”, tha Berisha.

Sipas Berishës, buxheti i ka të gjitha mundësitë për të përballuar faturen e rritjes së pagave dhe pensioneve, nëse i jepet fund abuzimeve.