Berisha: Mbi ëndrrat e rinisë ndërtohet ‘Shqipëria Madhështore’

Shqiperi

Gazeta Express

02/04/2025 18:32

Kryetari i Partisë Demokratike Sali Berisha gjatë fjalës së tij në prezantimin e programit të Rinisë, shpalli 39 ditët para zgjedhjeve si “ditët e 1-shave”, duke përdorur simbolikën e numrit 1, numri i fletës së votimit për PD-ASHM.

Berisha premtoi një program transformues për rininë, duke e përshkruar atë si një projekt për ndërtimin e një Shqipërie të re dhe të fuqishme. Berisha bëri thirrje për veprim dhe mobilizim të rinisë, duke iu besuar atyre rolin e arkitektëve të ardhmërisë së Shqipërisë.

“Unë jam sot këtu për tu dhënë ju fjalën, ju dhe gjithë të rinjve shqiptarë, se pas 11 majit një program transformues në qëndrimin e shtetit ndaj të rinjve, do të zbatohet me shpejtësi. Asgjë nuk mund të ndërtojë një vend me madhështi, më shumë se sa ndërtimi i ëndrrës së të rinjve të këtij vendi. Ëndrra juaj, ëndrrat tuaja janë ëndrrat mbi të cilat ndërtohet ‘Shqipëria Madhështore’, është projekti i “Shqipërisë Madhështore”, u shpreh Berisha.

“Do të bëjmë gjithçka që Shqipëria të jetë në duart tuaja. Do të bëjmë gjithçka që ju të jeni arkitektët e vërtetë të Shqipërisë Madhështore. Ndaj dhe ju ftoj këto 39 ditë ti shpallim ditët e 1-shave.  1-shat dhe 1-shi janë sa hyjnor dhe tokësor. 1-shi është numri i diellit, që ka krijuar gjithësinë.  1-shi është numri i fatit që përcakton dhe ndan historinë”, tha Berisha.