Berisha për hakerimin e email-eve të SPAK-ut: Akt i rëndë, po përdoren për të fshehur krimin

Shqiperi

Gazeta Express

03/04/2025 16:35

Kryetari i Partisë Demokratike, Sali Berisha, ka reaguar pas hakerimit të emaileve të një prej institucioneve më të rëndësishme të drejtësisë në Shqipëri, SPAK-ut, duke e cilësuar si një akt të rëndë. Gjatë një konference për media, Berisha ngriti dyshime rreth këtij sulmi dhe e lidhi atë me mundësinë që të ketë një vetëhakerim brenda institucioneve të SPAK-ut.

“U kthye koha që dosja para se të shkojë në gjykatë, shkon në PS. A është hakerim apo vetëhakerim, unë nuk e di, por është shumë e rëndë. Duan t’ia faturojnë Xhafës, por unë nuk di të të them, por këto po përdoren, edhe Fatmirit po i vijnë rrotull dhe po e akuzojnë se ka hakeruar kompjuterat e SPAK-ut”, tha Berisha, duke theksuar se ky sulm ka për qëllim të nxjerrë dosjet që mund të jenë të rëndësishme për të.

Berisha komentoi edhe raportin vjetor të SPAK-ut, duke shprehur shqetësimin për rënien e referimeve të veprave penale nga policia në organin e akuzës.

“Ky Ilir Matrixi shkoi aty për të bërë pikërisht këtë gjë, për të mbrojtur krimin, për të fshehur dosjet e krimit dhe për të mos i dorëzuar,” u shpreh Berisha.

Përveç kësaj, Berisha e akuzoi ministrin e brendshëm si një ushtar të ish-ministrit të Brendshëm, Saimir Tahiri.