Berisha prezanton kandidatët në Elbasan, premton investime në arsim: Më 11 maj merr fund dimri 12-vjeçar

Shqiperi

Gazeta Express

06/04/2025 12:49

Kreu i Partisë Demokratike, Sali Berisha, ka prezantuar sot në qytetin e Elbasanit kandidatët për deputetë të koalicionit PD – Aleanca për Shqipërinë Madhështore, duke shpallur 11 majin si ditën që, sipas tij, “do të shënojë fundin e dimrit 12-vjeçar të qeverisjes së Edi Ramës”.

Në një takim të mbajtur me qytetarët, Berisha e cilësoi Elbasanin si simbol të rezistencës dhe ndryshimit. “11 maji do të jetë dita e pranverës së vërtetë të demokracisë për Shqipërinë. Në 12 vitet e Edi Ramës, Elbasani u shkretua më shumë se në çdo pushtim, më shumë se në çdo luftë”, u shpreh ai.

Berisha premtoi se ekipi i tij është i përgatitur për të sjellë një “rilindje të vërtetë” në këtë qytet dhe në mbarë vendin.

“Deputetët e krahut tjetër politik janë përzierje Ndragheta-Çela. Qyteti nuk do të jetë më i mafias. Bandat do shkojnë aty ku e kanë vendin,” deklaroi Berisha.

Në të njëjtin takim, Berisha paraqiti edhe një platformë arsimore që, sipas tij, do të transformojë tërësisht sistemin aktual. Një nga premtimet kryesore ishte paga 1500 euro për mësuesit në përfundim të mandatit të parë qeverisës.

“Jua premtoj këtë nga ky qytet, djep i arsimit. Mësuesit nuk do të largohen më për mungesë orësh apo për paga të ulëta,” u shpreh lideri demokrat.