CNN: Trump ka nisur një luftë historike tregtare globale. Ja çfarë duhet të dini

Lajme

Gazeta Express

03/04/2025 13:35

Presidenti i SHBA-së, Donald Trump ka shpallur tarifa globale të paktën 10% për importet nga të gjitha vendet, si dhe tarifa të rritura për dhjetëra vende, nga Nikaragua deri në Kamboxhia.

Tarifat vijnë mbi taksat e mëparshme të vendosura mbi importet e çelikut, aluminit dhe makinave.

Këto tarifa përmbysin një shekull të politikës tregtare globale të Amerikës dhe kërcënojnë ta destabilizojnë ekonominë botërore, shkruan CNN.

Ja çfarë duhet të dini:

Kush u godit më rëndë? Tarifat prekin të gjithë, nga aleatët e vjetër të SHBA-së – si BE-ja (20%), Koreja e Jugut (26%) dhe Japonia (24%) – deri te ishujt e pabanuar dhe shtetet më të varfra dhe më të cenueshme të botës. Kina u godit më së rëndi me një tarifë të re 34% mbi taksat ekzistuese 20%, duke arritur një total prej 54%.

Kanadaja dhe Meksika u kursyen: Kanadaja dhe Meksika, dy nga partnerët më të mëdhenj tregtarë të SHBA-së, u përjashtuan nga tarifat e reja më të larta “reciproke” të shpallura. Megjithatë, këto vende mbeten subjekt i një tarife 25% të shpallur më parë për mallrat që nuk mbulohen nga marrëveshja e tregtisë së lirë me SHBA-në.

Si u vendosën tarifat? Tarifimi u prezantua si “reciprok”, por duket se është llogaritur sipas një formule të thjeshtë: deficiti tregtar i vendit, i ndarë me eksportet e tij në SHBA, shumëzuar me gjysmën. Kjo do të thotë se vendet që eksportojnë më shumë në SHBA sesa importojnë janë të taksuara më shumë.

Çfarë tha Kina: Kina e dënoi veprimin e Trump si “shantazh” dhe premtoi hakmarrje me kundërmasa.

Çfarë tha Kanadaja; Kryeministri i Kanadasë tha se tarifat do ta “ndryshojnë në mënyrë thelbësore sistemin tregtar ndërkombëtar” dhe premtoi t’i luftojë ato me kundërmasa.

Çfarë tha BE-ja: Liderja e BE-së i cilësoi tarifat si një “goditje të madhe për ekonominë botërore” dhe tha se blloku po përgatit kundërmasa ndaj tarifës së re 205 për importet e bllokut në SHBA.

Çfarë tha Meksika: Presidentja e Meksikës, Claudia Sheinbaum, pritet ta shpallë përgjigjen e saj ndaj tarifave të SHBA-së të enjten pasdite me orën lokale.

Ndikimi ekonomik: Bursat amerikane ranë ndjeshëm pas shpalljes së tarifave, ashtu si edhe tregjet aziatike. Ari arriti një rekord të ri të lartë, pasi investitorët kërkojnë investime më të sigurta. Ekonomistët kryesorë i thanë CNN-it se tarifat mund të çojnë në një recesion global.