Dani Olmo dhe Pau Victor marrin dritën jeshile për të luajtur deri në fund të sezonit

Futboll

Gazeta Express

04/04/2025 8:50

Dani Olmo dhe Pau Victor janë lejuar për të luajtur për Barcelonën për pjesën e mbetur të sezonit, ka njoftuar Këshilli Kombëtar i Sportit i Spanjës (CSD).

La Liga i kishte dhënë përkohësisht Barcelonës licenca për të regjistruar Olmon dhe Victorin verën e kaluar, por më vonë i anuloi regjistrimet, duke pretenduar se klubi nuk kishte arritur të vërtetonte se po i përmbushte rregullat financiare të ligës brenda afatit të 31 dhjetorit.

CSD i dha Barcelonës leje për t’i rikthyer përkohësisht të dy lojtarët pas një ankese në janar.

Të mërkurën, La Liga deklaroi se klubi nuk ka kapacitet financiar për t’i regjistruar sulmuesit.

Por CSD anuloi marrëveshjen mes kampionatit spanjoll dhe Federatës Spanjolle të Futbollit (RFEF).

CSD tha se regjistrimet e dy lojtarëve mbeten të vlefshme pasi RFEF ka pranuar se “nuk ekziston asnjë vendim federate që të ketë miratuar anulimin e licencave” dhe se vendimi i saj për të mos dhënë licencën është “i pavlefshëm”.

La Liga tha se do ta apelojë vendimin.

Në një deklaratë të dhënë të mërkurën, La Liga njoftoi se ka ulur kufirin e pagave të Barcelonës pas parregullsive në bilancin e tyre financiar për sezonin 2024-25.

Barcelona kishte shpallur më 3 janar një marrëveshje për të shitur ambiente VIP në stadiumin e saj Nou Camp, që është në rindërtim, për të mbledhur 100 milionë euro (83 milionë paund) në mënyrë që të përmbushte rregullat e Fair Play-t Financiar të La Ligës dhe të zgjaste regjistrimin e Olmos dhe Victorit.

Por La Liga tha se kjo marrëveshje nuk ishte përfshirë në llogaritë që Barcelona i dorëzoi ligës javën e kaluar dhe se ishte miratuar nga një auditor tjetër, i paidentifikuar.

Olmo ka qenë pjesë e akademisë së Barcelonës përpara se të largohej për të luajtur me Dinamo Zagreb dhe RB Leipzig.

Barcelona pagoi 52 milionë paund për ta rikthyer mesfushorin e kombëtares spanjolle verën e kaluar dhe ai ka luajtur 28 ndeshje këtë sezon, përfshirë 13 pas vendimit të CSD-së.

Victor gjithashtu është formuar te akademia e njohur La Masia e Barcelonës dhe ka luajtur 22 ndeshje këtë sezon, pesë prej të cilave pas vendimit të CSD-së.