Dënohet dhuna ndaj futbollistit të ri të komunitetit ashkali në Obiliq

Lajme

Gazeta Express

27/04/2025 12:16

Një sulm fizik dhe verbal mbi një futbollist 15-vjeçar të komunitetit ashkali gjatë një ndeshjeje futbollit në Obiliq, ka nxitur reagime të mëdha në gjithë vendin gjatë kësaj jave.

Belgin Jashari, 15 vjeç, u shkelmua nga një burrë gjatë një ndeshjeje të 15-vjeçarëve mes klubit të fij Fushë Kosova dhe shkollës së futbollit Arsenali më 21 prill në Obiliq, rreth 10 kilometra larg kryeqytetit Prishtinë.

Klubi i tij e publikoi një video ku shihet një burrë teksa i kalon rrethojat e fushës, futet brenda dhe e godet me shkelm Jasharin, si dhe e fyen atë në baza racore, sipas klubit.

Klubi tha se veprimi i burrit ka qenë i motivuar “për fat të keq, nga përkatësia etnike e lojtarit si pjesëtar i komunitetit ashkali. Sulmuesi ka përdorur gjithashtu fjalor ofendues dhe gjuhë me përmbajtje të rëndë racore”.

Presidentja e Kosovës, Vjosa Osmani, e dënoi dhunën ndaj Jasharit si akt “të papranueshëm dhe të patolerueshëm në shoqërinë tonë”.

“Dhuna dhe diskriminimi në sport janë sulm i drejtpërdrejtë ndaj vlerave tona më të shtrenjta: respektit, barazisë dhe dinjitetit njerëzor. Dënoj ashpër dhunën fizike dhe verbale ndaj futbollistit të ri, Belgin Jashari”, tha Osmani.

Një burrë 47-vjeçar është dërguar në mbajtje për 48 orë si i dyshuar për sulmin ndaj Jasharit, njoftoi Policia e Kosovës më 26 prill.

Policia tha se e ka marrë në pyetje të dyshuarin, si dhe ka marrë edhe dëshminë e futbollistit të ri.

Ashkalinjtë janë një pakicë e vogël në Kosovë dhe njëlloj sikurse pakicat tjera si romët dhe egjiptianët, ata përballen me diskriminim dhe sfida të ndryshme, si qasje e kufizuar në punësim, arsimim, kujdes shëndetësor dhe banim.

Në një raport të vitit 2024, Qeveria e Kosovës e pranon se ka diskriminim të vazhdueshëm ndaj komuniteteve rom, ashkali dhe egjiptian. Për këtë, ajo ka krijuar një Grupi Teknik Punues dhe të një Platforme Kombëtare që synojnë adresimin e ankesave dhe promovimin e barazisë, megjithëse sfidat në zbatimin e tyre vazhdojnë të jenë të pranishme.

Reagimet kundër dhunës fizike dhe diskriminimit racor, si dhe mbështetja për Jasharin ishin të shumta.

Ministrja në detyrë e Kosovës, Albulena Haxhiu, tha se Kosova është atdhe i të gjithë neve, pa asnjë dallim.

“Shtypja, racizmi dhe çfarëdo dhune tjetër nuk mund të tolerohet prandaj ky rast duhet të trajtohet me seriozitet të lartë duke ndëshkuar autorin dhe me qëllim të parandalimit të rasteve të ngjashme në të ardhmen”, tha Haxhiu në Facebook.

Mimoza Kusari, deputete e Lëvizjes Vetëvendosje, tha se racizmi, hegjemonia dhe ndjenja e superioritetit ndaj të tjerëve duhet të luftohen dhe parandalohen çdo ditë nga të gjithë.

“Kosova është shtëpia e të gjithë atyre që jetojnë këtu dhe ndihen pjesë e saj”, tha ajo.

Deputeti i Lidhjes Demokratike të Kosovës, Avdullah Hoti, shprehu mbështetjen e tij për Jasharin, duke shkruar në Facebook “jemi me ty Belgin”.

“Ky sulm duhet të dënohet ashpër. Talenti duhet të vlerësohet. Askush nuk duhet të ndihet i kërcënuar për asgjë. Çdo formë racizmi duhet të zhduket. Paragjykimi nuk ka vend”, shkroi Hoti.

Federata e Futbollit e Kosovës dhe Komiteti Olimpik i Kosovës e dënuan dhunën ndaj Jasharit dhe shprehën mbështetjen e tyre për futbollistin.

Federata e futbollit tha se ngjarjet e tilla janë “të papranueshme dhe bien ndesh me sportin dhe vlerat që ne i kultivojmë si shoqëri: respektin, barazinë dhe dinjitetin njerëzor”. /REL/