Deri në 160 persona në vit në RMV diagnostikohen nga tuberkulozi

Maqedoni

Gazeta Express

03/04/2025 16:05

130 deri në 160 persona në vit diagnostikohen me sëmundjen e tuberkulozes, ndërsa gjashtë deri në 15 persona në vit humbin jetën për shkak të kësaj sëmundje. Drejtori i Institutit të Tuberkulozit Dimitar Karkinski, tha se më së shumti nga kjo sëmundje preken njerëzit të cilët janë me kushte të rënda financiare, ndërsa nuk janë të përjashtuar përdoruesit e drogës dhe alkoolit.

“Mirë është që Maqedonia është vend me rrezik të ulët për paraqitjen e tuberkulozes, 10 në 100.000 persona preken nga kjo sëmundje, por problemi me tuberkulozen është se ajo është sëmundje infektuese. Kjo do të thotë se problemi nuk është vetëm për të sëmurin që ka tuberkuloz, por ka edhe një dimension tjetër social, pasi është sëmundje ngjitëse”, tha Dimitar Karkinski, drejtor i Institutit të Tuberkulozit.

Të gjithë ata që kanë kollitje të pandërprerë më shumë se dy javë duhet të paraqiten në mjek. Ndërsa, për shërimin e tuberkulozit nevojiten gjashtë muaj.

“Ata që janë të sëmurë shumica e tyre ankohen për kollitje, dhe kollitje me gjak që është edhe motiv për tu paraqitur në mjek, më pas humbje të apetitit, ndërsa ajo që është karakteristike është djersitja në orët e natës sidomos në pjesën e qafës. Apeloj tek të gjitha njerëzit që të kontaktojnë me mjekët amë nëse kanë kollitje më shumë se dy deri në tre javë që të fillojnë të monitorohen për cilën do sëmundje respiratore, por edhe tuberkulozen”, tha Zorica Nanoviq, pulmologe.

Për këtë vit deri më tani është regjistruar vetëm një rast i vdekjes nga tuberkulozi, konkretisht një i ri i cili ka qenë përdorues i drogës. Mjekët apelojnë për kujdes të shtuar dhe të mos neglizhohet sëmundja e tuberkulozit.