Diplomacia dhe sporti

Sport

Gazeta Express

03/04/2025 21:57

Kosova është në qendër të vëmendjes për më shumë se 24 orë, pas ngjarjeve të ndodhura në Beograd, në Kongresin e 49-të të UEFA-s, duke e kthyer në diskutim rëndësinë e diplomacisë në sport, sidomos për vetë Kosovën.

Ky kongres “i zakonshëm” doli të jetë “i jashtëzakonshëm”, me flamurin e Kosovës që u shpalos në mes të Beogradit, por më pas u dogj nga huliganë serb, duke shkaktuar reagime të shumta e të ashpra nga të gjitha anët

Pas rastit të mbrëshëm, Federata e Futbollit e Serbisë kërkoi falje për “lëshimin”, duke u futur në veprim për të mos lejuar më FFK-në që të prezantohet me simbole shtetërore, por vetëm me logon e FFK-së, shkruan “Gazeta Express”.

Këtë e dëshmuan shumë foto e video të publikuara nga ky kongres – i organizuar nga UEFA – por që ishte federata serbe që e mori vendimin.

Nga FFK-ja gjatë ditës lëshuan një komunikatë që thanë se aty ishin të prezantuar me simbole shtetërore, por që një gjë të tillë nuk e besoi as ministri i Ministrisë së Kulturës, Rinisë dhe Sportit, Hajrulla Çeku, i cili tha se është e qartë që në këtë kongres nuk kishte simbole shtetërore të Kosovës.

Ai përmes një postimi në rrjetin social “Facebook” tha se do të presin përgjigje zyrtare e sqarime nga UEFA për këtë veprim, siq e quan ai “të turpshëm”.

“Largimi i flamurit të Republikës së Kosovës në Kongresin e UEFA-së në Beograd është veprim i turpshëm, i papranueshëm dhe i dënueshëm. Kosova është shtet i pavarur, që përfaqësohet në botë përmes simboleve shtetërore. Federata e Futbollit e Kosovës është anëtare me të drejta të plota e UEFA-së”.

“Largimi i simboleve është sulm i drejtpërdrejtë ndaj integritetit shtetëror të Kosovës dhe si i tillë nuk mund të kalojë pa reagim të mirëfilltë ndërkombëtar. Presim sqarime nga UEFA-ja dhe veprime efektive për të adresuar përgjegjësinë për këtë shkelje të rregullave të tyre të brendshme dhe këtë sulm ndaj shtetit të Kosovës. Dënojmë ashpër gjuhën e përdorur nga Federata e Serbisë në komunikatën e tyre, e cila mjerisht, me vetëdije të plotë pranon të instrumentalizohet nga politika shoviniste serbe”, ka shkruan Çeku në “Facebook”.

Ai gjatë ditës po ashtu dha një informacion, duke thënë se u ka thënë të gjitha federatat sportive që të largohen nga organizimi/ngjarja nëse nuk përdoren simbolet shtetërore.

“E kemi një politikë që e kemi komunikuar me gjitha federatat. Kudo që ndodhin ngjarjet sportive në botë, pjesëmarrje duhet të ketë vetëm me simbolet tona shtetërore. Pa simbole, nuk ka pjesëmarrje. Largimi i simboleve, do të thotë largimi i sportistëve të Kosovës”, deklaroi ai në “Kanal10”.

Mirëpo, një gjë e tillë nuk ndodhi në Beograd nga FFK-ja, dhe madje nuk pati asnjë reagim, as gjatë kongresit – ku e kishin mundësinë për ta bërë një gjë të tillë – por as deri në momentin e publikimit të këtij teksti.

Për një gjë të tillë, para pak javësh kishte reaguar edhe ish-u.d i sekretarit të FFK-së, Taulant Hodaj, përmes një letre dorëheqje dërguar FFK-së – siguruar e publikuar për herë të parë nga “Gazeta Express”.

Hodaj kishte thënë se shpeshherë, FFK-ja rreshtohet me shtete që nuk e njohin e madje e kundërshtojnë Pavarësinë e Kosovës.

“Rreshtimi i FFK-së me shtete që nuk e njohin dhe madje e kundërshtojnë pavarësinë e Kosovës në votime dhe vendime të ndryshme në UEFA dhe FIFA është i papranueshëm. Këto veprime dëmtojnë drejtpërdrejt Kosovën dhe minojnë mbështetjen e federatave që kanë avokuar dhe votuar për pranimin e Kosovës në UEFA dhe FIFA”, thuhej në letrën e dorëheqjes që avokati Hodaj ia kishte dërguar FFK-së dhe Agim Ademit, e publikuar nga “Gazeta Express”./GazetaExpress/