Djali 18-vjeçar i Rio Ferdinand debuton si titullar për “përvojë pune”

Futboll

Gazeta Express

31/03/2025 11:19

Lorenz Ferdinand, djali i madh i ish-mbrojtësit të Manchester United dhe Anglisë, Rio Ferdinand, e nisi me fitore karrierën e tij në ekipin e parë të shtunën, ndërsa babai i tij e shikonte nga tribunat.

Portieri 18-vjeçar, i cili është nën kontratë me skuadrën e Premier League, Brighton & Hove Albion, u bashkua me ekipin e kategorisë së shtatë, Havant & Waterlooville, pas një marrëveshjeje për “përvojë pune” midis dy klubeve.

Një marrëveshje e tillë i lejon një lojtari të ri të fitojë përvojë të vlefshme në ligat e ulëta, zakonisht për disa javë ose muaj.

Në këtë rast, Ferdinand do të jetë pjesë e ekipit të trajnerit Shaun North deri në fund të sezonit 2024/25, pas një dëmtimi të portierit titullar Ben Dudzinski, i cili do të mungojë për një kohë të gjatë.

Klubi e konfirmoi afrimin e ri të premten me një deklaratë:

“Havant & Waterlooville Football Club është i lumtur të njoftojë se portieri Lorenz Ferdinand i është bashkuar ekipit në një marrëveshje përvojë pune nga klubi i Premier League, Brighton & Hove Albion, deri në fund të sezonit.”

Deklarata shtonte: “Ferdinand, 18 vjeç, është rritur si lojtar në akademinë e Brighton & Hove Albion dhe aktualisht vazhdon të përmirësojë aftësitë e tij me ekipin e tyre U21. Lorenz i bashkohet skuadrës së Shaun North për pjesën e mbetur të sezonit.”

Pas këtij njoftimi, lojtari i ri u hodh menjëherë në formacionin titullar për përballjen e Northern Premier League kundër Marlow FC.

18-vjeçari bëri një paraqitje mbresëlënëse të shtunën në Oak Tree Road, ndërsa një tregolësh i Ryan Seager siguroi një fitore 3-1 për ekipin e tij të ri.

Rio Ferdinand u pa në tribunë duke ndjekur debutimin e shumëpritur të djalit të tij në nivelin e të rriturve.

Në vitin 2023, Lorenz firmosi një kontratë menaxhimi me agjencinë New Era Global Sports, ku babai i tij, Rio, shërben si ambasador dhe mentor.

“Djali ynë i madh është në rrugëtimin e tij në futboll. Një moment tjetër i bukur, duke firmosur me @neweraglobalsports, të fituar me punë dhe përkushtim,” shkroi Rio Ferdinand në Instagram.

“Është një rrugë e gjatë me ulje dhe ngritje, ndaj mbështetja e duhur dhe profesionale është e nevojshme – kështu që përpara @neweraglobalsports. Të dua, Lorenz.” /GazetaExpress/