Drejtori i Prishtinës: Klubet të bëhen bashkë për ta ndalur këtë situatë

Futboll

Gazeta Express

20/05/2024 10:59

Drejtori i përgjithshëm i FC Prishtinës, Artan Osmani ka qenë mbrëmë mysafir në emisionin sportiv “Favorit” në T7.

Ai foli për gjendjen aktuale të klubit Bardhekaltër në prag të ndeshjes së Kupës së Kosovës, duke shpresuar që kryeqytetasit do ta mposhtin Ballkanin të mërkurën në finale.

Gjithashtu, Osmani e shprehu brengën e tij që, sipas tij, klubi prishtinas po dëmtohet nga referët, respektivisht nga Federata e Futbollit të Kosovës, shkruan “Gazeta Express”.

Ai kërkoi nga krejt klubet e Superligës që të bëhen bashkë për ta ndalur të keqen dhe për ta nxjerrë futbollin kosovar nga kjo situatë e vështirë.

Sipas Osmanit, prishtinasve iu mohuan plot 12 pikë nga dëmtimi që ua bënë referët, gjë që ua pamundësoi të kërkonin më shumë në këtë edicion.

“I kemi reduktu shpenzimet në masë të madhe, nuk ka qenë prioritet gjithsesi për ta synuar titullin. Patjetër, do ta synojmë titullin e kampionit në sezonin tjetër. Pavarësisht rezultatit të Kupës, do ta synojmë titullin. Po shpresojmë që të përfundojë kjo situatë me FFK-në dhe me referim sepse nëse vazhdohet edhe një sezon i tillë, shpresoj që krejt klubet e Superligës të bëhen bashkë në një moment të caktuar dhe ta ndalojmë këtë situatë sepse nuk është në rregull që të dëmtohet klubi më i madh në Kosovë. Mos me ta lon me marr pjesë në Evropë, mos me leju me konkurru për titull të kampionit deri në fund, është e papranueshme. Nëse rregullohen këto 2-3 elemente, nuk ka me pas telashe”, deklaroi fillimisht Osmani në “Favorit”.

“Është e paevitueshme, pronari i Ballkanit, pronari i Llapit, krejt janë të pakënaqur. Gjatë gjithë sezonit ka pasur probleme, tensione, ngarkesa. Krejt këto evitohen nëse këta njerëz bëhen bashkë dhe e formojnë Shoqatën e Klubeve, që është e paevitueshme dhe të fillojmë të punojmë drejt promovimit të të drejtave të tona dhe të promovimit të sportit. E jo me leju që prej 10 pronarëve të ekipeve të Superligës, pesë prej tyre për mos me komuniku njëri me tjetrin”, vazhdoi ai.

“Janë 12 pikë që janë të konfirmuara që na kanë dëmtuar, por ka marrë fund tash. Emisioni i juaj keni qenë më të zëshmit”, përfundoi Osmani.

Për ta parë të plotë emisionin “Favorit” në Youtube mund të klikoni më poshtë. /Gazeta Express/