Duhanpirja: Alternativat reduktojnë riskun dhe ndihmojnë ekonominë evropiane

Lajme

Gazeta Express

03/04/2025 11:19

Evropa po zhvillon alternativa ndaj pirjes tradicionale të duhanit.

Kjo është edhe shpresa e organizatës joqeveritare EPIC, ose ndryshe Këshilli i Inovacionit për Politikat Evropiane, i cili publikoi raportin me titull: ’’Fundi i duhanit? Si Evropa mund të shpëtojë miliona jetë duke promovuar rritjen ekonomike.’’ Studimi evidenton ndikimin ekonomik që ka zinxhiri i duhanit në nivel evropian dhe ofron një këndvështrim pragmatik mbi rregullimin e këtij tregu, çka do të ndihmonte në zbutjen e dëmeve të shkaktuara nga konsumi i duhanit, shkruan eunews.

Sipas autorit Antonios Nestoras, themelues dhe CEO i Këshillit të Inovacionit për Politikat Evropiane, duke pasur parasysh se përdoruesit e duhanit dhe nikotinës nuk do të zhduken brenda natës, Evropa duhet të inkurajojë adoptimin e alternativave më të sigurta ndaj pirjes së duhanit.

Kjo qasje do të përmbushte tre qëllime kryesore: Ruajtjen e kontributit ekonomik të një industrie tërësisht të ndërtuar në Evropë; Përmirësimin e shëndetit publik përmes një kuadri rregullator që balancon reduktimin e dëmit me nevojën për heqjen graduale të cigareve; Parandalimin e tregut të paligjshëm, të produkteve me standarde të ulëta sigurie që vijnë kryesisht nga Kina.

Ndikimi ekonomik i duhanit në Evropë

Në nivel evropian, sektori i duhanit kontribuon me 223.7 miliardë euro në vit në PBB, ose 1.3% të PBB-së totale të Bashkimit Evropian.

Të ardhurat totale vjetore nga taksat mbi duhanin arrijnë në 112.9 miliardë euro (një shumë e barasvlershme me 55.4% të shpenzimeve totale aktuale të BE-së për mbrojtjen). Industria punëson, drejtpërdrejt dhe indirekt, më shumë se 2.1 milionë njerëz, me një total pagash që i kalojnë 60 milionë euro.

Tregu i paligjshëm

Për shkak të tregut të paligjshëm të cigareve, humbasin 11.6 miliardë euro në vit që përfaqëson 8.3% të konsumit total. Këto humbje financiare mund të përdoren për të rritur aktivitetet publike të kërkimit dhe zhvillimit në të gjitha vendet anëtare të BE-së me 52.5%, duke përmirësuar kështu inovacionin dhe zhvillimin në Evropë.

Raporti tregon se si nxitja e investimeve në alternativa më pak të dëmshme mund të jetë një strategji efektive për të reduktuar dëmet shëndetësore, për ruajtjen e kontributit ekonomik të një zinxhiri furnizimi mbarë-evropian dhe për të luftuar tregun e paligjshëm nga produktet me cilësi të ulët.

Në lidhje me rishikimin e Komisionit Evropian të Direktivës së Produkteve të Duhanit (TPD) dhe Direktivës së Taksimit të Duhanit (2011/64/BE), raporti thekson se marrja e masave ekstreme mund të dëmtojë tregun evropian, duke inkurajuar tregtinë e paligjshme.

Prandaj, raporti i bën thirrje institucioneve që të miratojnë një kuadër rregullator i cili mbron zinxhirin evropian të duhanit dhe më shumë se 2.1 milionë vende pune.