Durana Tech Park pret “banorët” e parë, Rama: Interes i lartë nga kompani të huaja, produkt konkret i një vizioni që dukej utopik

Shqiperi

Gazeta Express

02/04/2025 20:08

Durana Tech Park, hapësira që synon të bëhet një qendër kyçe për rritjen e sipërmarrjeve dhe zhvillimin teknologjik në rajon, ka nisur zyrtarisht rrugëtimin e saj me certifikimin e rezidentëve të parë.

Në ceremoninë e hapjes, Kryeministri Edi Rama theksoi se ky park teknologjik është një rezultat konkret i një vizioni që dikur dukej utopik. “Ashtu siç kemi arritur të bëjmë Shqipërinë lider në shërbimet publike elektronike, tani kemi një hapësirë të dedikuar për inovacionin, e cila ka tërhequr tashmë interes të madh nga kompani dhe institucione akademike ndërkombëtare”, deklaroi ai.

Sipas Ramës, Durana Tech Park nuk do të jetë vetëm një qendër për investime të huaja, por një mundësi për të zhvilluar talentin vendas. Ai nënvizoi se disa start-up-e shqiptare, të mbështetura nga qeveria që në fillimet e tyre, tashmë janë bërë pjesë e parkut.

Durana Tech Park ofron një regjim tatimor shumë të favorshëm për kompanitë rezidente, duke përfshirë 0% TVSH, 0% tatim mbi fitimin dhe 0% tatim mbi të ardhurat personale për 10 vite. Gjithashtu, kontributet shoqërore për punonjësit kufizohen në vetëm 95 euro/muaj, duke e bërë këtë park një destinacion tërheqës për investitorët dhe sipërmarrësit.

Vendosur në Xhafzotaj, në afërsi të Portit të Durrësit dhe Aeroportit Ndërkombëtar të Tiranës, Durana Tech Park synon të bëhet një nyje kyçe për zhvillimin teknologjik, duke ofruar akses të drejtpërdrejtë në tregun më të madh të punës në Shqipëri dhe duke sjellë një epokë të re për inovacionin dhe sipërmarrjen në vend.