Durmishi: Sfidat moderne kërkojnë një sistem ligjor të qartë

Maqedoni

Gazeta Express

02/04/2025 15:40

Ministri i Ekonomisë dhe Punës, Besar Durmishi, mori pjesë dhe mbajti fjalën hyrëse në konferencën “Reforma e Ligjit për Marrëdhëniet e Punës – sfidat dhe drejtimet”, e cila u zhvillua më 2 prill 2025 në Aleksandar Palace – Shkup.

Konferenca mblodhi përfaqësues të sindikatave, punëdhënësve, organizatave ndërkombëtare dhe ekspertëve të fushës për të diskutuar drejtimet e mundshme të reformës së ligjit për marrëdhëniet e punës.

Në fjalën e tij, ministri Durmishi vuri në dukje se sfidat moderne kërkojnë një sistem ligjor të qartë, fleksibil për punëdhënësit, të drejtë për punëtorët dhe funksional për shtetin.

“Asnjë reformë nuk është e lehtë, por nuk ka sukses pa guxim, partneritet dhe vizion. Ky është momenti ynë i përbashkët për të ndërtuar një bazë të fortë për gjeneratat që vijnë,” u shpreh Durmishi.

Konferenca shënon një hap të rëndësishëm drejt një procesi gjithëpërfshirës të reformimit të legjislacionit të punës, me qëllim ndërtimin e një tregu pune të drejtë, modern dhe të qëndrueshëm.