Dyshohet se ia dha pyetjet e testit një kandidati, arrestohet anëtari i komisionit në KRU “Hidromorava” në Gjilan

Lajme

Gazeta Express

29/04/2025 16:42

Policia e Kosovës ka njoftuar se kanë siguruar prova që zyrtarë të KRU “Hidromorava” në Gjilan kanë keqpërdorur detyrën zyrtare.

Në njoftim thuhet se anëtarët e komisionit të caktuar për zhvillimin e procedurave të dy konkurseve për punësim, i kanë dhënë pyetjet e përgjigjet e testit me shkrim duke e favorizuar një kandidat.

Sot janë intervistuar  anëtarët e komisionit dhe është kuptuar që V.M. ia kishte dhënë pyetjet e testit me shkrim një kandidati,

Ai është ndaluar për 48 orë.

Njoftimi i plotë:

Hetuesit policorë nga Drejtoria për Hetimin e Krimeve Ekonomike dhe Korrupsionit (DHKEK), përkatësisht Njësia Rajonale për Hetimin e Krimeve Ekonomike dhe Korrupsionit (NJRHKEK) Gjilan, në bashkëpunim me Prokurorinë Themelore Gjilan, gjatë zhvillimit të hetimeve rreth një rasti, kanë siguruar prova të besueshme se zyrtarë të KRU ,,Hidromorava’’ në Gjilan kanë keqpërdorur detyrën e tyre zyrtare.

Dyshohet se anëtarë të komisionit të kësaj kompanie, të caktuar për zhvillimin e procedurave të dy konkurseve për punësim, i kanë dhënë pyetjet-përgjigjet e testit me shkrim, duke e favorizuar njërin prej kandidatëve i cili të nesërmen do t’i nënshtrohej këtij testi me shkrim.

Sot me datën 29.04.2025 ne zyrat e NJHRKEK-Gjilan, janë intervistuar anëtaret e komisionit në cilësinë e të dyshuarave në prezencën e avokatit sipas detyrës zyrtare, gjate intervistave është kuptuar se i dyshuari V.M., (viti i lindjes 1984, mashkull kosovar), ia kishte dhëne pyetjet e testit me shkrim paraprakisht një kandidati.

Me këto veprime është krijuar dyshim i bazuar se i dyshuari V.M., (anëtar i komisionit) ka kryer veprën penale të “Keqpërdorimi i pozitës apo autoritet zyrtare”.

Për rastin është njoftuar prokurori i shtetit, i cili ka nxjerrë aktvendim për ndalimin e të dyshuarit për 48 orë, ndërsa katër të dyshuarit e tjerë janë liruar në procedurë të rregullt .