E kapi për hunde trajnerin e Galatasarayt, Mourinho suspendohet me tri ndeshje

Futboll

Gazeta Express

06/04/2025 11:09

Trajneri i Fenerbahçes, Jose Mourinho, është pezulluar me tre ndeshje pasi u pa duke i kapur hundën trajnerit të Galatasarayt, Okan Buruk, pas përfundimit të ndeshjes së Kupës së Turqisë.

Incidenti ndodhi pas fishkëllimës së fundit në stadiumin Şükrü Saracoğlu të mërkurën, kur të dy trajnerët po ndërvepronin me zyrtarët e ndeshjes pas fitores 2-1 të Galatasarayt.

Mourinho iu afrua Burukut nga pas dhe u pa duke i kapur hundën, gjë që bëri që ish-mesfushori i kombëtares turke, 51 vjeç, të binte në tokë duke mbuluar fytyrën me duar.

Portugezi, ish-trajner i Chelsea, Manchester United dhe Tottenham, u gjobit gjithashtu me 292,500 lira turke (rreth 5,955 £).

Galatasaray e akuzoi Mourinhon për një “sulm fizik” ndaj Burukut.

Nga ana tjetër, Fenerbahçe e akuzoi Burukun se “u soll si të ishte qëlluar me armë” dhe pretendoi se ai kishte bërë “gjeste fyese me duar” për të provokuar Mourinhon.

Bordi Profesional i Disiplinës së Futbollit (PFDK) tha se kishte marrë në konsideratë veprimet e Burukut, çka çoi në zbutjen e dënimit të Mourinhos për shkak të “provokimit”.

Ndihmësi i Mourinhos, Salvatore Foti, u pezullua me katër ndeshje për një “fyerje ndaj një lojtari kundërshtar”.

Gjithashtu, gjatë një përplasjeje pranë stola gjatë kohës shtesë, u ndëshkuan me karton të kuq Mert Yandaş i Fenerbahçes dhe Kerem Demirbay e Barış Yılmaz të Galatasarayt.

Mesfushori Yandaş, 30 vjeç, është pezulluar me një ndeshje.

Tensionet mes dy klubeve ishin të larta që më parë, pasi në shkurt Galatasaray kishte deklaruar se do të “niste procedura penale” ndaj Mourinhos për “deklarata raciste” pas një barazimi pa gola.

Por këtë të premte, Fenerbahçe njoftoi se Prokuroria e Stambollit e kishte hedhur poshtë ankesën penale të Galatasarayt ndaj Mourinhos.