Ekspertja kryesore e mjekësisë në Harvard: A flini në krah? – merrni parasysh këtë këshillë

Keshilla Mjekësore

Gazeta Express

28/01/2025 20:59

A jeni një që flini në krah, si një “yll deti” apo preferoni të shtriheni me bark?

Shumica prej nesh kanë një pozicion specifik që preferojnë për një gjumë të rehatshëm gjatë natës.

Por ekspertët thonë se tre ndryshime të vogla mund të jenë të dobishme si për ciklin tuaj të gjumit, ashtu edhe për shëndetin – veçanërisht nëse flini në krah!

Sipas Dr. Trisha Pasricha, instruktore e mjekësisë në Shkollën Mjekësore të Harvardit, këto truke të thjeshta mund të reduktojnë presionin në ije dhe madje të ndihmojnë në drejtimin natyral të shtyllës kurrizore.

Në një video në Instagram, që ka marrë mbi 25,000 pëlqime, ajo shpjegoi se mosbërja e tyre mund të përkeqësojë dhembjet në qafë.

 “Së pari, përkulni pak këmbët dhe vendosni një jastëk midis gjunjëve për të ndihmuar në drejtimin e shpinës”, tha ajo transmeton GazetaExpress.

“Kjo gjithashtu ndihmon në reduktimin e presionit në ije. Së dyti, merrni krahun që keni poshtë dhe përqafojeni veten paksa ndërsa flini. Shihni si kjo drejton natyrshëm shtyllën time kurrizore”.

“Një studim i vitit 2021 zbuloi se ata që flinin në krah, por nuk përdornin këto truke, zgjoheshin me më shumë dhembje në qafë.”

Ekspertët prej kohësh kanë paralajmëruar se fjetja në bark mund të shtojë tensionin në qafë, pasi ajo mbetet e kthyer në njërën anë gjatë gjithë natës.

Dr. Pasricha rekomandoi gjithashtu një pozicion tjetër fjetjeje, i cili, në varësi të faktit nëse merrni ose jo medikamente, mund të rrisë shanset për një gjumë të thellë dhe të gjatë.

“Fjetja në anën e majtë është në fakt një mënyrë e shkëlqyer për të ndihmuar me urthin,” tha ajo.

“Hulumtimet kanë treguar se kur flemë në anën e majtë, më pak acid mund të ngjitet në ezofag. Kjo sepse kur flemë në shpinë ose në anën e djathtë, stomaku pozicionohet pak mbi ezofagun, kështu që përmbajtjet mund të ngjiten më lehtë në ezofag. Fjetja në anën e djathtë, megjithatë, ka disa avantazhe – veçanërisht nëse jeni dikush që merr medikamente para gjumit”.

Një studim i vitit 2022 në revistën Physics of Fluid, nga Universiteti John Hopkins, zbuloi se shtrirja në anën e djathtë gjatë gjumit mund të shpejtojë përthithjen e medikamenteve me rreth 13 minuta.

Ndërkohë, shtrirja në anën e majtë thuhej se ngadalësonte përthithjen me më shumë se një orë.

“Kjo sepse shtrirja në anën e djathtë i lejon medikamentet të kalojnë më shpejt nga stomaku në zorrën e hollë, ku përthithen,” shtoi Dr. Pasricha.

Kjo vjen pasi një hulumtim vitin e kaluar zbuloi se rreth një në gjashtë britanikë vuajnë nga pagjumësia, ndërkohë që 65 për qind prej tyre nuk kërkojnë kurrë ndihmë për problemet e tyre me gjumin.

Një anketë me 2,000 persona, nga The Sleep Charity, zbuloi se nëntë në dhjetë persona përjetojnë njëfarë problemi me gjumin, ndërsa një në dy angazhohet në sjellje të rrezikshme kur nuk mund të flejë.

Gjumi i dobët është lidhur me një sërë problemesh shëndetësore, përfshirë kancerin, goditjet në tru dhe infertilitetin.

Ekspertët prej kohësh kanë këshilluar se zgjimi gjatë natës nuk do të thotë domosdoshmërisht se vuani nga pagjumësia, e cila, sipas shifrave, prek deri në 14 milionë britanikë.

Megjithatë, mungesa e gjumit ka pasojat e saj, nga irritimi dhe ulja e përqendrimit në periudhë të shkurtër, deri te rritja e rrezikut për obezitet, sëmundje të zemrës dhe diabet.

Sipas Shoqatës Amerikane të Gjumit, gati 70 milionë amerikanë gjithashtu kanë një çrregullim të gjumit gjatë jetës së tyre. /GazetaExpress/