Europianët duhet të pajisen me një leje që duhet të blihet onlinë nëse duan të shkojnë në Mbretërinë e Bashkuar

Lajme

Gazeta Express

02/04/2025 11:35

Vizitorët europianë në Mbretërinë e Bashkuar do të kenë nevojë për një leje të re hyrjeje online nga e mërkura, ndërsa qeveria britanike ndryshon rregullat e kahershme të udhëtimit, shkruan The Guardian.

Udhëtarët nga Europa tani do të kenë nevojë për një leje digjitale Electronic Travel Authorisation (ETA), të cilën zyrtarët britanikë thanë se po e zbatojnë për ta rritur sigurinë dhe për t’i thjeshtuar proceset e hyrjes. Do të ketë një periudhë tranzicioni që mund të zgjasë disa muaj, raporton AFP.

Leja mund të blihet online në ditët në vijim për 12€, por çmimi do të rritet nga 9 prilli në 19€.

ETA është prezantuar tashmë për shtetasit amerikanë, kanadezë dhe ata të vendeve të tjera të përjashtuara nga viza, që e vizitojnë Britaninë, e cila u largua nga Bashkimi Europian në vitin 2020.

Leja lejon vizita deri në gjashtë muaj. Ajo lidhet në mënyrë digjitale me pasaportën e aplikantit dhe është e vlefshme për dy vjet.

Aplikimi, i cili mund të bëhet përmes një aplikacioni në smartphone ose në faqen zyrtare të qeverisë, është hapur për europianët që nga fillimi i marsit. Ai vlen për shtetasit e rreth 30 vendeve europiane, duke përfshirë të gjitha vendet e BE-së përveç Irlandës.

Aplikanti duhet të ofrojë një foto të pasaportës dhe të fytyrës së tij. Procesi zgjat rreth 10 minuta, sipas Ministrisë së Brendshme britanike.

Në shumicën e rasteve, vendimi mbi aplikimin merret brenda pak minutash, por qeveria rekomandon që të lihet një afat deri në tre ditë pune.

Leja kërkohet edhe për foshnjet dhe fëmijët, por pasagjerët ajrorë që kalojnë tranzit pa e kaluar kufirin e MB përjashtohen nga kjo.