Gimenez e vazhdon rekordin e dobët të Milanit në dështimin për të shënuar gol nga penalltia

Futboll

Gazeta Express

31/03/2025 9:19

Santiago Gimenez u bë lojtari më i fundit i Milanit që dështoi nga pika e bardhë gjatë humbjes 2-1 të së dielës mbrëma ndaj Napolit të Antonio Contes, duke përkeqësuar më tej përqindjen e shndërrimit të penalltive të skuadrës së tij.

Milani reagoi shumë vonë në stadiumin “Diego Armando Maradona”, dhe pavarësisht golit të vonshëm të Luka Jovic dhe mundësisë nga penalltia, Rossonerët u mposhtën nga golat e pjesës së parë të Matteo Politano dhe Romelu Lukakut.

Gimenez, i cili iu bashkua Milanit nga Feyenoord për një shumë rreth 35 milionë euro në janar, nuk ka shënuar në pesë ndeshjet e fundit dhe u përpoq ta ndryshonte këtë me një goditje nga pika e bardhë.

Megjithatë, pati konfuzion fillestar, pasi Christian Pulisic ka qenë ekzekutuesi i rregullt i penalltive për Milanin këtë sezon. Amerikani e mori topin nga Rafael Leao, por më pas vendosi t’ia kalonte shokut të tij të skuadrës.

Në fund, ishte një penallti e dobët nga sulmuesi meksikan: pa fuqi të mjaftueshme dhe e goditur shumë afër mesit të portës – Alex Meret e priti lehtësisht duke u hedhur në drejtimin e duhur.

Si rezultat, Milani ka dështuar të shënojë në 44.44% të penalltive të fituara këtë sezon. Nga nëntë penallti të ekzekutuara, katër janë humbur dhe pesë janë realizuar.

Pulisic ka shënuar katër nga pesë, Tammy Abraham ka shënuar një nga dy tentativat e tij, ndërsa Theo Hernandez dhe Gimenez kanë humbur nga një penallti secili (me vetëm një tentativë secili). /GazetaExpress/