Gjyqtari i finales së Kupës së Mbretit përlotet, shkaku i kritikave dhe presionit nga televizioni i Real Madridit

Sport

Gazeta Express

25/04/2025 16:20

Ricardo de Burgos Bengoetxea, arbitri i finales së Copa del Rey mes Real Madrid dhe Barcelonës që do të zhvillohet të shtunën, u përlot të premten, duke reaguar ndaj një videoje kritikuese të publikuar nga kanali televiziv i klubit madrilen (RMTV).

Videoja, e publikuar të enjten, tregon atë që RMTV e quan një seri gabimesh të bëra nga De Burgos gjatë karrierës së tij si arbitër.

Publikimi është i fundit në një varg montazhesh nga RMTV, të cilat kritikojnë arbitrat spanjollë.

De Burgos shprehu shqetësimin e tij gjatë një konference për shtyp, duke thënë: “Kur një fëmijë shkon në shkollë dhe shokët i thonë se babai i tij është hajdut, të dhemb në shpirt.”

Ai theksoi ndershmërinë e tij dhe sfidat që përballojnë shumë gjyqtarë, si në futbollin profesionist ashtu edhe në nivelet amatore.

“Ajo që bëj është t’i mësoj djalit tim se babai i tij është një njeri i ndershëm, që bën gabime si çdo sportist tjetër. Është shumë e vështirë, nuk ia rekomandoj askujt…

“Nuk është normale ajo që po kalojmë, jo vetëm në futbollin profesionist, por edhe në atë amator. Të gjithë duhet të reflektojmë se ku duam të shkojmë, çfarë duam nga sporti dhe nga futbolli.”

Real Madrid nuk ka reaguar menjëherë ndaj komenteve të De Burgos.

Pablo Gonzalez Fuertes, zyrtari i VAR-it për finalen e së shtunës, tha se gjyqtarët së shpejti do të marrin masa për shkak të presionit të vazhdueshëm që përballojnë.

“Do të fillojmë të ndërmarrim masa të vërteta, nuk do të vazhdojmë të tolerojmë atë që po ndodh,” tha ai.

“Brenda pak ditësh do ta shihni të gjithë. Do të bëjmë histori dhe nuk do të vazhdojmë të durojmë këtë situatë. Një grevë? Do të merrni lajme nga ne së shpejti.”

Në shkurt, Federata Spanjolle e Futbollit (RFEF) theksoi shqetësimet e gjyqtarëve për abuzimin, duke përmendur rastin e gjyqtarit Jose Munuera Montero, i cili u përball me kritika të ashpra pas dhënies së një kartoni të kuq për Jude Bellingham të Real Madridit.

Disa javë më herët, Real Madrid gjithashtu kishte dorëzuar një letër ankese kundër gjyqtarëve spanjollë pas humbjes 1-0 ndaj Espanyol./GazetaExpress/