“God Bless America” premierë në Teatrin e Gjilanit

Arte

Gazeta Express

02/04/2025 15:38

Shfaqja “God Bless America” do të luhet premierë në Teatrin e Gjilanit më 9 dhe 10 prill. Autor dhe regjisor i shfaqjes është Fatos Berisha.

“God Bless America” është historia e katër shitësve të Biblës. Katër shokë, pasi marrin një trajnim nga një specialist shitjeje dhe adresa e sugjerime nga kisha se ku mund të shesin Biblën dhe materiale të tjera religjioze, shëtisin në çdo shtet të Amerikës për të shitur Biblën dhe kështu të sigurojnë mirëqenien familjare.

Ata futen në shtëpitë e njerëzve dhe përpiqen, me metoda të ndryshme, t’i bindin ata të blejnë Biblën. Në rrugëtimin e tyre takojnë njerëz nga shtresa të ndryshme të shoqërisë dhe nuk kursejnë metoda për të shitur Biblat.

Në një mini-univers të xhunglës bashkëkohore të mbijetesës, ata udhëtojnë nëpër ‘vendin e mundësive – Amerikën’ duke u shtirur si “engjëj” në punë dhe duke u shfrenuar në privatësinë e hoteleve dhe dhomave të tyre.