Hakeri 15-vjeçar ndërhyn në e-mailet dhe faqet zyrtare të institucioneve shtetërore, vihet nën hetim/ Sekuestrohen laptopë, celularë dhe një dron

Shqiperi

Gazeta Express

04/04/2025 12:14

Policia e Vlorës ka finalizuar me sukses operacionin e koduar “The Accountant”, që kishte në fokus goditjen e ndërhyrjeve të paautorizuara në sistemet kompjuterike të disa institucioneve shtetërore.

Pas një hetimi njëmujor, të ndjekur me metoda speciale, është identifikuar dhe vënë në hetim një i mitur 15-vjeçar, banues në Vlorë, i dyshuar si autor i ndërhyrjes kibernetike gjatë muajit mars 2025. Sipas hetimeve, ai ka depërtuar në email-e dhe faqe zyrtare të institucioneve shtetërore, duke shkaktuar ndërprerje të funksionimit për periudha të caktuara.

Hetimet janë zhvilluar nga Sektori i Hetimit në Drejtorinë Vendore të Policisë Vlorë, nën drejtimin e Prokurorisë pranë Gjykatës së Juridiksionit të Përgjithshëm Vlorë, me mbështetjen e Drejtorisë së Hetimit të Krimeve Kibernetike dhe Shërbimit Informativ Shtetëror.

Nga të dhënat paraprake, nuk rezulton vjedhje e të dhënave apo dokumenteve konfidenciale. Gjatë operacionit janë sekuestruar 5 laptopë, 6 celularë dhe 1 dron, të cilët do t’i nënshtrohen ekspertizës teknike.