Hakohen e-mailet e SPAK, arrestohen dy persona brenda 24 orëve

Shqiperi

Gazeta Express

03/04/2025 13:39

Një ndërhyrje e paligjshme në sistemin e e-mail-eve të Prokurorisë së Posaçme (SPAK) është zbuluar falë një hetimi intensiv të zhvilluar nga vetë institucioni në bashkëpunim me BKH-në dhe Sektorin e Ekspertizës.

Brenda 24 orëve, autoritetet kanë arritur të identifikojnë dhe arrestojnë dy persona të përfshirë në këtë skandal: Njëri ka kryer ndërhyrjen kibernetike, duke aksesuar në mënyrë të paligjshme të dhënat e SPAK. Tjetri ka shpërndarë informacionin e përftuar, duke e transmetuar te persona të tretë

Gjatë operacionit, janë sekuestruar pajisjet elektronike të përdorura për ndërhyrjen dhe skedarët e shkarkuar, të cilët tani janë në duart e hetuesve për analiza të mëtejshme.

SPAK ka konfirmuar se hetimet vazhdojnë për të zbuluar nëse ka të tjerë të përfshirë në këtë ngjarje dhe për të kuptuar qëllimin e ndërhyrjes. Siguria kibernetike mbetet një nga sfidat kryesore për institucionet shqiptare, dhe ky rast ngrit sërish alarmin për nevojën e forcimit të mbrojtjes ndaj sulmeve të tilla.