Hansi Flick e analizon lojën e Interit, para ndeshjes së nesërme

Sport

Gazeta Express

29/04/2025 18:34

Trajneri i Barcelonës, Hansi Flick, ka pranuar se megjithëse ka pak kohë për t’u përgatitur për ndeshje të mëdha, ai kërkon përmirësime si nga performanca në finalen e Copa del Rey, ashtu edhe në qasjen ndaj Interit në gjysmëfinalen e parë të Ligës së Kampionëve. Katalanasit do të kenë avantazhin e fushës në ndeshjen e parë në Montjuïc, ashtu si në çerekfinale.

Flick foli me shumë respekt për Interin, duke theksuar se bëhet fjalë për një kundërshtar shumë të vështirë:

“Jemi të fokusuar vetëm në ndeshjen e parë, që është hapi i parë drejt objektivit tonë. Interi është shumë i fortë – kanë një nga mbrojtjet më të mira në Evropë. Mesfusha e tyre është e shkëlqyer dhe dy sulmuesit janë shumë të rrezikshëm. Por edhe kalimet e tyre në sulm janë shumë të shpejta. Mbrojnë mirë, por sulmojnë po aq mirë. Duhet të jemi gati.”

Trajneri gjerman nuk është i shqetësuar për ndonjë rënie të fokusit pas euforisë së fitores ndaj Real Madridit:

“Ajo fitore është shumë e rëndësishme për moralin tonë dhe na ndihmon të vazhdojmë përpara. Të gjithë lojtarët janë të përqendruar dhe duan finalen. Mendoj se mund të arrijmë atje. Ata do japin maksimumin, por edhe ne po ashtu.”

Edhe pse shpesh flitet për moshën e re të skuadrës së Barcelonës, Flick theksoi se motivimi i veteranëve të Interit nuk duhet nënvlerësuar:

“Liga e Kampionëve është një mundësi e artë për Interin që ta fitojnë trofeun. Për disa prej lojtarëve të tyre mund të jetë edhe shansi i fundit, kështu që do të japin gjithçka. Kjo është e qartë – dhe ne duhet të bëjmë të njëjtën gjë.”

Lidhur me faktin që Interi luajti një ditë më vonë, të dielën, ai nuk u shqetësua:

“Nuk është puna ime. Jam i fokusuar vetëm te skuadra ime. Kemi mentalitetin për të fituar dhe për të dhënë maksimumin në ndeshjen e parë.”

Ai foli edhe për përgatitjet taktike për Interin dhe mundësitë e përshtatjes ndaj një ekipi që ka vështirësuar punën për gjigantët evropianë, përfshirë Manchester Cityn dhe vetë Barcelonën në të kaluarën:

“Sigurisht që kemi bërë stërvitje sot. Kemi diskutuar për çfarë duhet të ndryshojmë. Ata do të kenë pesë lojtarë në mesfushë, kështu që duhet të mbrojmë hapësirat. Është shumë e rëndësishme për ne të mbajmë zotërimin e topit dhe të reduktojmë gabimet. Ata kanë automatizma të qarta dhe ne duhet të jemi të përqendruar si në posedim, ashtu edhe në mbrojtje.”

Barcelona ka bërë mirë kundër ekipeve të mëdha këtë sezon, por përballja me Interin do të jetë një test i vështirë dhe ndryshe nga të tjerët. Ekipi i Simone Inzaghit ka treguar se është i vështirë për t’u mposhtur dhe gjithmonë krijon rrezik për kundërshtarët./GazetaExpress/