Haziri nxjerr një sekret të “kornizës së re” franko-gjermane për dialogun

Lajme

Gazeta Express

12/10/2022 6:59

Sipas nënkryetarit të Lidhjes Demokratike të Kosovës, Lufti Haziri, propozimi franko-gjerman për procesin e dialogut Kosovë-Serbi, ka qenë propozim edhe në bisedimet e Vjenës.

“Tani, disa nga këto marrëveshje të propozuara, që po fliten, kanë qenë të propozuara edhe në bisedimet e Vjenës”, ka theksuar ai në RTK.

Megjithatë, për njërin prej delegatëve të Kosovës në Vjenë, iniciativa të tilla krijojnë një momentum dhe, sipas Hazirit, shihet se po shkohet drejt një situate të re politike.

Kurse, duke folur për transparencën e kryeministrit Kurti karshi procesit të tanishëm të dialogut, ai potencoi se ky i fundit tani e ka kuptuar që negociatat nuk bëhen gjithmonë publike.

“Tashmë kryeministri e ka kuptuar se transparenca është pjesa më e vogël e negociatave karshi atyre që i ka në negociata, sepse nuk janë gjithmonë të hapura, të njohura dhe nuk bëhen shumë publike”, tha Haziri.

Ai bëri me dije se Kurti do të mbështetet për dialogun me Serbinë duke shtuar se për herë të parë Kosova nuk ka parti politike apo grup parlamentar që është anti-dialogut.

Ndryshe, kryeministrit të Kosovës, Albin Kurtit dhe ministres së punëve të Jashtme, Donika Gërvallës, iu është dashur gati një muaj kohë që ta pranojnë ekzistencën e “kornizës së re” për marrëveshje në mes të Kosovës e Serbisë, e propozuar nga Gjermania dhe Franca, derisa në Serbi, presidenti Aleksandër Vuçiç, e pranoi disa herë se e ka parë një dokument të tillë.

Në dokumentin e publikuar nga Albanian Post më 18 shtator, shkruhej për zgjidhjen finale dhe normalizim raportesh mes dy shteteve, e cila parashihte që vitin e ardhshëm të arrihet një njohje de facto e Kosovës nga Serbia dhe në hark kohor prej 10 vjetësh të vije edhe njohja de jure bashkë edhe me anëtarësimin në Bashkimin Evropian.